პარლამენტის დროებითი საგამოძიებო კომისია კომისიის სხდომაზე გამოუცხადებლობის გამო სტრატეგია აღმაშენებლის ლიდერ გიორგი ვაშაძესთან დაკავშირებით გენერალურ პროკურატურას მიმართავს.

ამასთან, სხდომაზე დაბარებულ კიდევ ერთ პოლიტიკოსს, კოალიცია ცვლილებისთვის ერთ-ერთ ლიდერს, ნიკა მელიას, კომისია მოუწოდებს გამოცხადდეს სხდომაზე, წინააღმდეგ შემთხვევაში კი, შემდგომი რეაგირებისთვის პროკურატურაში მისი საქმეც გაიგზავნება.

აღნიშნულის შესახებ ნაციონალური მოძრაობის ხელისუფლების საქმიანობის შემსწავლელი დროებითი საგამოძიებო კომისიის თავმჯდომარემ, თეა წულუკიანმა განაცხადა.

"სხდომის საჯაროდ გახსნა შეგვიყოვნდა იმ მიზეზიდან გამომდინარე, რომ პირველი პირი, ვინც ახსნა-განმარტებისთვის გახლდათ დაბარებული კომისიის წინაშე, იყო ბატონი გიორგი ვაშაძე, რომელიც 10:00 საათზე იყო მოწვეული. ახლა, როგორც ყველა ხედავთ, 11:30 საათია. მისთვის პროცედურულად აბსოლუტურად ცალსახად იყო ცნობილი, რომ ის დღეს, კომისიის წინაშე უნდა გამოცხადებულიყო 10:00 საათზე. აბსოლუტურად ყველა პარამეტრით გონივრული დრო არის გასული მას მერე, რაც ის უნდა გამოცხადებულიყო სხდომაზე და არ გამოცხადდა. დოკუმენტურად დადასტურებულია, რომ მან იცოდა, რომ დაბარებული იყო კონკრეტულ დღეს, კონკრეტულ საათზე, მაგრამ როგორც ვხედავთ, საათ ნახევარია გასული და ის არ მობრძანებულა. შესაბამისად, საკითხს კენჭისყრაზე ვაყენებ, რომ გიორგი ვაშაძის საქმე სსკ-ის 349-ე მუხლის სავარაუდო დარღვევასთან დაკავშირებით გადაეგზავნოს საქართველოს პროკურატურას.

სხდომაზე დაბარებულია ნიკა მელია და მე მას მოვუწოდებ, რომ მობრძანდეს. წინააღმდეგ შემთხვევაში მოგვიწევს იგივე გადაწყვეტილება მივიღოთ, რაც სულ ახლახან მივიღეთ ბატონი გიორგი ვაშაძის შემთხვევაში," — განაცხადა წულუკიანმა კომისიის სხდომაზე.

შეგახსენებთ, ნაციონალური მოძრაობის ხელისუფლების საქმიანობის შემსწავლელი დროებითი საგამოძიებო კომისიის თავმჯდომარემ, თეა წულუკიანმა კომისიაზე არ გამოცხადებისთვის პროკურატურას გადასცა:

  • ძლიერი საქართველოსთვის ერთ-ერთი ლიდერი, მამუკა ხაზარაძე;
  • ძლიერი საქართველოსთვის ერთ-ერთი ლიდერი, ბადრი ჯაფარიძე;
  • კოალიცია ცვლილებებისთვის ერთ-ერთი ლიდერი, ნიკა გვარამია
  • კოალიცია ცვლილებებისთვის ერთ-ერთი ლიდერი, ზურაბ გირჩი ჯაფარიძე;
  • თავდაცვისა და უშიშროების ყოფილი კომიტეტის თავმჯდომარე, გივი თარგამაძე;
  • თავდაცვის ყოფილ მინისტრი, ირაკლი ოქრუაშვილი;

ცნობისთვის, ცნობისთვის, 21 მარტის წინა ხელისუფლების საქმიანობის შემსწავლელი კომისიის სხდომის დაწყებისას კომისიის თავმჯდომარემ, თეა წულუკიანმა განაცხადა, რომ პარლამენტის საგამოძიებო კომისიის სხდომაზე გამოუცხადებლობა სისხლის სამართლის პასუხისმგებლობას იწვევს, რაც ჯარიმას ან თავისუფლების 1 წლით აღკვეთას გულისხმობს.

ძლიერი საქართველოსთვის ლიდერებს მამუკა ხაზარაძესა და ბადრი ჯაფარიძეს საქალაქო სასამართლოს გადაწყვეტილებით, 50 000-ლარიანი გირაო შეეფარდათ. ჯაფარიძემ საქალაქო სასამართლოს გადაწყვეტილება, 50 000-ლარიანი გირაო, სააპელაციოში გაასაჩივრა.