ბილი აილიში, რომელიც 12 წლიდან ვეგანია, უკვე დიდი ხანია ცხოველთა უფლებების დამცველი აქტივისტია. გასულ კვირას, ჟურნალ Elle-თან ვიდეოინტერვიუს დროს, მომღერალს ჰკითხეს, თუ რომელია მისთვის ისეთი ურყევი პრინციპი, რომელსაც არასდროს დათმობდა.

"ვიცი, ამის გამო ბევრს აღარ მოგეწონებით, მაგრამ ხორცის ჭამა არსებითად არასწორია", — თქვა ბილი აილიშმა, — "შეუძლებელია, ძალიან გიყვარდეს ცხოველები და ამავდროულად ხორცს ჭამდე. ბოდიში, მაგრამ ასეა — შეგიძლიათ, ჭამოთ ხორცი ან გიყვარდეთ ცხოველები, ეს თქვენი ნებაა, მაგრამ ორივეს ერთად ვერ იზამთ".

კრიტიკამ არ დააყოვნა — სოციალურ ქსელებში მწვავე დებატები დაიწყო ისეთ თემებზე, როგორიცაა პრივილეგირებულობა, ხელმისაწვდომობა და ცხოველთა კეთილდღეობა. ხუთშაბათს ბილი აილიშმა სოციალურ ქსელში კრიტიკის ტალღას უპასუხა და ინსტაგრამის სთორიში ცხოველთა სასაკლაოებზე გადაღებული მძიმე კადრები გამოაქვეყნა.

"წადით, ერთ-ორ დოკუმენტურ ფილმს ან იმ კადრებს უყურეთ, თუ რას უშვრებიან იმ ცხოველებს, რომლებიც, თქვენი თქმით, ძალიან გიყვართ. თუ ამ კადრების ყურება გაგიჭირდებათ, გირჩევთ, საკუთარ თავს კითხვები დაუსვათ. უბრალოდ, დავიღალე იმით, რომ ცოცხალი არსებების დაცვა და ემპათიის გამოხატვა ასეთ სკანდალებს იწვევს", — წერს ბილი სოციალურ პლატფორმებზე.

2021 წელს ბილი აილიშის მოთხოვნით Oscar de la Renta-მ გაყიდვიდან საერთოდ ამოიღო ცხოველის ბეწვისგან დამზადებული სამოსი. იმავე წელს, ბილის Met Gala-ზე Oscar de la Renta-ს კაბა ეცვა.