მაიამი-დეიდის შერიფის ოფისის ორი თანამშრომელი ამტკიცებს, რომ მსახიობების კრიმინალურმა დრამამ, რომელიც წელს Netflix-ზე გამოვიდა, მათ პირად და პროფესიულ რეპუტაციას მნიშვნელოვანი ზიანი მიაყენა.

ორი ფლორიდელი პოლიციელის თქმით, ფილმში სამართალდამცავების გამოსახვის გამო რეპუტაციული ზიანი მიადგათ. ოფიცრები ამტკიცებენ, რომ ფილმი და მისი სარეკლამო კამპანია მიანიშნებს გადაცდომებზე, არაეთიკურ ქცევასა და არაპროფესიონალიზმზე, რომელიც რეალურ საპოლიციო ოპერაციასთან არის დაკავშირებული.

მაიამი-დეიდის შერიფის ოფისის თანამშრომლები, ჯეისონ სმიტი და ჯონათან სანტანა მსახიობების კომპანიას, Artists Equity-ს უჩივიან. მიუხედავად იმისა, რომ სმიტი და სანტანა ფილმში სახელებით არ არიან მოხსენიებულნი, სარჩელში აღნიშნულია, რომ მეთ დეიმონისა და აფლეკის პერსონაჟები იმდენად მჭიდროდ ასოცირდებიან ამ ორ ოფიცერთან, რომ მათმა ეკრანულმა სახემ მნიშვნელოვანი ზიანი მიაყენა რეალური პირების რეპუტაციას.

პოლიციელების სარჩელი, რომელიც Entertainment Weekly-მ მოიპოვა, აფლეკისა და მეთ დეიმონის კომპანიებს ცილისწამებასა და ემოციური ტრავმის განზრახ მიყენებაში ადანაშაულებს. აფლეკის, მეთ დეიმონისა და Artists Equity-ს წარმომადგენლებს კომენტარი ჯერ არ გაუკეთებიათ, ხოლო Netflix-მა, რომელიც საქმეში მოპასუხედ არ ფიგურირებს, კომენტარზე უარი თქვა.

ფილმი The Rip მოგვითხრობს ლეიტენანტ დეინ დიუმარსისა (მეთ დეიმონი) და დეტექტივ სერჟანტ ჯეი დი ბირნის (აფლეკი) შესახებ, რომლებიც კარტელის კუთვნილ 20 მილიონ დოლარს პოულობენ, რაც ფარდას ხდის მაიამი-დეიდის პოლიციის დეპარტამენტში არსებულ კორუფციას. მოსარჩელეები აცხადებენ, რომ ფილმის შთაგონების წყარო გახდა 2016 წლის ივნისში მომხდარი რეალური შემთხვევა, როდესაც სმიტმა და სანტანამ 21 მილიონ დოლარზე მეტი ამოიღეს. ისინი ამტკიცებენ, რომ ფილმში გამოყენებული უნიკალური დეტალები მაყურებელს უქმნის გონივრულ ვარაუდს, რომ ეკრანზე სწორედ ეს პოლიციელები არიან გამოსახულნი.

სარჩელში ხაზგასმულია მომენტები, სადაც პერსონაჟები საპოლიციო პროცედურებს არღვევენ. ერთ-ერთ სცენაში აფლეკის პერსონაჟი ნარკოტიკებთან ბრძოლის სამმართველოს აგენტს კლავს. მოსარჩელეები ამბობენ, რომ მიუხედავად წარწერისა "შთაგონებულია რეალური ამბებით", კარტელის კუთვნილი დიდი თანხის ამოღების ფაქტის გარდა, ფილმში ასახული მოვლენები სინამდვილეში არ მომხდარა.

ოფიცრების ადვოკატების თქმით, ოჯახის წევრები და კოლეგები მათ კლიენტ პოლიციელებს ეუბნებიან, თითქოს ამოღებული ფული პირადი მიზნებისთვის გამოიყენეს: შეიძინეს ავტომობილები, კატერები და შვილებს კერძო სკოლებში ასწავლიან. ადვოკატების თქმით, მაყურებლები მაიამი-დეიდის პოლიციას და კონკრეტულ ოფიცრებს ფილმში ნაჩვენებ კორუმპირებულ სახეებთან აიგივებენ.

საჩივრის თანახმად, ადვოკატებმა ჯერ კიდევ 2025 წლის დეკემბერში გაუგზავნეს კომპანიებს წერილი და ფილმის გამოშვების შეჩერება მოითხოვეს, თუმცა პასუხი მხოლოდ 2026 წლის იანვარში, პრემიერის შემდეგ მიიღეს. მწარმოებლებმა უპასუხეს, რომ წუხილი უსაფუძვლოა, რადგან ფილმში ოფიცრების სახელები ნახსენები არ არის.

ახლა სმიტი და სანტანა საჯარო უარყოფას, შესწორებას და ფილმზე სპეციალური განმარტების დართვას ითხოვენ. ასევე, ითხოვენ კომპენსაციას მიყენებული ზიანისთვის და საადვოკატო ხარჯების ანაზღაურებას.