"აუცილებლად მინდა და ვფიქრობ მეუფე შიო გახდება საქართველოს ახალი კათოლიკოს-პატრიარქი" — განაცხადა ბიზნესმენმა, ლაშა პაპაშვილმა სამების საკათედრო ტაძრის ეზოში, გაფართოებული კრების დაწყებამდე "ტვ პირველის" ჟურნალისტთან საუბრისას.

პაპაშვილის თქმით, საქართველოს ახალი კათოლიკოს-პატრიარქი მეუფე შიო გახდება.

"აუცილებლად მინდა და ვფიქრობ, რომ მეუფე შიო გახდება საქართველოს შემდგომი, ახალი კათოლიკოს-პატრიარქი. ყველამ, არათუ შემდგომმა პატრიარქმა, ყველა ქართველმა, მე ადრეც ვთქვი სხვა გადაცემაში, უნდა მივბაძოთ ჩვენს უწმინდესს," — განაცხადა მან.

ჟურნალისტის შეკითხვაზე, ლობირებენ თუ არა ბიზნესმენები მიმდინარე პროცესებს, პაპაშვილმა აღნიშნა, რომ მსგავსი შეფასებები სიმართლეს არ შეესაბამება. ამასთან, როგორც მან განაცხადა, კრებაზე ის მიწვეული სტუმარია.

"არამგონია, ბიზნესმენები... მხოლოდ მე ვარ აქ დღეს სტუმრად მოწვეული. სულ რამდენიმეა, ხელზე ჩამოსათვლელი, ამიტომაც არ არის მართალი, რომ რამეს ლობირებენ ბიზნესმენები," — აღნიშნა ბიზნესმენმა.

ცნობისთვის, გაფართოებული კრება, დღეს, 11 მაისს, 13:00 საათზე თბილისში, ყოვლადწმინდა სამების სახელობის საპატრიარქო ტაძარში გაიმართება. კენჭისყრა სამ კანდიდატს შორის გაიმართება, რომლებიც 28 აპრილს საპატრიარქოში გამართულ სინოდის სხდომაზე შეირჩნენ. ესენი არია: სენაკისა და ჩხოროწყუს მიტროპოლიტი და საპატრიარქო ტახტის მოსაყდრე შიო, მროველ-ურბნელი მიტროპოლიტი იობ აქიაშვილი და ფოთისა და ხობის მიტროპოლიტი გრიგოლ ბერბიჭაშვილი. კენჭისყრაზე გამარჯვებისთვის საჭიროა, რომ სამი კანდიდატიდან რომელიმემ მოაგროვოს 39 ხმიდან ნახევარზე მეტი, 20 ხმა. 28 აპრილს გამართულ სინოდის სხდომაზე საპატრიარქო ტახტის მოსაყდრე შიომ 20 ხმა მიიღო, მიტროპოლიტებმა გრიგოლმა და იობმა 7-7 ხმა.

საპატრიარქოს ცნობით, მორწმუნეებს სამების ტაძრის ეზოში ფეხით შესვლა შეუფერხებლად შეეძლებათ. მათივე ცნობით, ეზოში დიდი ეკრანებია დამონტაჟებული, საიდანაც საზოგადოებას შეეძლება, თვალი ადევნოს კრების მუშაობას.