აშშ-ის ფედერალურმა სასამართლომ პრეზიდენტ დონალდ ტრამპის ადმინისტრაციის წინააღმდეგ მორიგი გადაწყვეტილება მიიღო — ნიუ-იორკის საერთაშორისო ვაჭრობის სასამართლოს კოლეგიამ დაადგინა, რომ პრეზიდენტის მიერ დაწესებული 10%-იანი გლობალური ტარიფები უკანონოა. ინფორმაციას NBC News ავრცელებს.

სასამართლო დავა მცირე ბიზნესის წარმომადგენლების სარჩელის საფუძველზე დაიწყო. მოსამართლეთა უმრავლესობამ (2 ხმით 1-ის წინააღმდეგ) მიიჩნია, რომ ტრამპმა გადააჭარბა იმ უფლებამოსილებას, რომელიც კონგრესმა პრეზიდენტს სატარიფო პოლიტიკის სფეროში მიანიჭა.

"დაწესებული ტარიფები ბათილია და არ არის ავტორიზებული კანონის მიერ", — ნათქვამია სასამართლოს გადაწყვეტილებაში.

აღნიშნული 10%-იანი ტარიფები ტრამპის ადმინისტრაციამ მას შემდეგ შემოიღო, რაც მიმდინარე წლის თებერვალში აშშ-ის უზენაესმა სასამართლომ კიდევ უფრო მასშტაბური, ორნიშნა ციფრით განსაზღვრული ტარიფები გააუქმა. ახალი შეზღუდვები, რომლებიც 1974 წლის სავაჭრო აქტის 122-ე მუხლის საფუძველზე დაწესდა, მიმდინარე წლის 24 ივლისს უნდა ამოწურულიყო. უზენაესმა სასამართლომ დაადგინა, რომ აღნიშნული აქტი პრეზიდენტს ასეთი ტარიფების დაწესების უფლებას არ აძლევდა. აშშ-ის კონსტიტუციის თანახმად, გადასახადების, მათ შორის ტარიფების დადგენის უფლება ეკუთვნის კონგრესს, თუმცა კანონმდებლებს შეუძლიათ ამ ძალაუფლების ნაწილის დელეგირება პრეზიდენტზე.

თეთრი სახლი, სავარაუდოდ, ამ გადაწყვეტილებას ვაშინგტონში მდებარე სააპელაციო სასამართლოში გაასაჩივრებს, რის შემდეგაც საქმე შესაძლოა კვლავ უზენაეს სასამართლომდე მივიდეს.