დუა ლიპამ Samsung-ის წინააღმდეგ სასამართლოში სარჩელი შეიტანა, რომლითაც $15 მილიონს ითხოვს. პოპვარსკვლავი ამტკიცებს, რომ კომპანიამ მისი სახე ტელევიზორების გასაყიდად ყოველგვარი ნებართვისა და ფინანსური ანაზღაურების გარეშე გამოიყენა.

საჩივრის მიხედვით, Samsung მომღერლის ფოტოს გასული წლიდან მოყოლებული ტელევიზორების შესაფუთ ყუთებზე გამოსახავდა. როცა დუამ ამის შესახებ შეიტყო, კომპანიისგან მისი გამოსახულების გამოყენების დაუყოვნებლივ შეწყვეტა მოითხოვა, მაგრამ მათ მომღერლის მოთხოვნა არ დააკმაყოფილეს.

"დუას სახე ფართომასშტაბიანი მარკეტინგული კამპანიისთვის მისი ცოდნის, ყოველგვარი ანაზღაურებისა და კონტროლის გარეშე გამოიყენეს. დუა ლიპას ამგვარ გამოყენებაზე ნებართვა არ გაუცია და არც არასდროს გასცემდა," — ნათქვამია სარჩელში.

ფოტო: Variety

სასამართლოში წარდგენილი დოკუმენტების მიხედვით, Samsung-მა იმ ილუზიის შექმნით, თითქოს მომღერალი მათ პროდუქციას რეკომენდაციას უწევდა, სარგებელი ნახა.

საჩივრის თანახმად, ლიპა თავად ფლობს საავტორო უფლებებს Samsung-ის მიერ გამოყენებულ ფოტოზე, რომელიც 2024 წელს, ფესტივალ Austin City Limits-ის კულისებშია გადაღებული.

სარჩელში მოყვანილია პლატფორმა X-ის მომხმარებელთა კომენტარები იმის საჩვენებლად, რომ მომხმარებელთა ნაწილმა Samsung-ის ტელევიზორები სწორედ მომღერლის "რეკომენდაციის" გამო შეიძინა.

"ტელევიზორის ყიდვას საერთოდ არ ვგეგმავდი, მაგრამ ყუთზე მისი ფოტო დავინახე და გადავწყვიტე, შემეძინა," — ვკითხულობთ საჩივარში ციტირებულ ერთ-ერთ კომენტარში.

სხვა მომხმარებელი კი წერს: "ამ ტელევიზორს მხოლოდ იმიტომ ვიყიდდი, რომ მასზე დუა ლიპაა გამოსახული. აი, როგორ ძალიან მიყვარს დუა".

სარჩელში ხაზგასმულია, რომ ლიპა საკმაოდ მკაცრად არჩევს პროდუქტებს, რომლებსაც არეკლამებს.

მომღერლის მხარე დავას რამდენიმე მიმართულებით აწარმოებს: საჩივარი მოიცავს როგორც საავტორო უფლებების დარღვევას, ასევე საჯაროობის უფლების შესახებ კანონის დარღვევას.