სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ ევროპული სახელმწიფოს სასარგებლოდ ჯაშუშობის ბრალდებით დაკავებულ გიორგი უძილაურზე კომენტარი გააკეთა. მთავრობის სხდომის შემდეგ გამართულ ბრიფინგზე მამუკა მდინარაძემ სახელმწიფო უსაფრთხოების სამსახურს მოუწოდა, რამდენიმე საათში გაევრცელებინა ვიდეო, რომელშიც უძილაურის მიერ დანაშაულის ჩადენის ამსახველი კადრები იქნებოდა ასახული.

"მე შემიძლია ვთხოვო უსაფრთხოების სამსახურს და მის ხელმძღვანელს, რომ უახლოეს საათებში გამოაქვეყნოს ვიდეო, მოკლე ვიდეო, სადაც იქნება აღწერილი — სხვა ნაწილს ალბათ ხვდებით რატომ ვერ გამოაქვეყნებენ — სადაც იქნება აღწერილი, როგორ იღებს კონკრეტული ადამიანი დირექტივებს, მისი ინსტრუქტაჟის შესახებ შეგვიძლია ეს გავაკეთოთ სახელმწიფომ, როგორ გადასცემენ მას კონვერტით თანხას და როგორ აწერს ხელს შესაბამის უწყისს. მე აქედან გავალ თუ არა, ვთხოვ უსაფრთხოების სამსახურს, რომ აი, ეს სამი ნაწილი, ერთად აღებული... დიახ, დაკავებულ პირზე ვსაუბრობ, რა თქმა უნდა, რადგან ვიღაცამ ეჭვი შეიტანა, ერთმა ადამიანმაც კი, რომ თითქოს რაღაც ეს მოგონილი ბრალდება იყო. რა თქმა უნდა, ინფორმაციას, რას გადასცემდა და ამ ნაწილებს ვერ გამოვაქვეყნებთ, ძალიან ბევრი ჩანაწერი არსებობს იმ საქმეში, მოხდება განსაიდუმლოება და გამოქვეყნდება ინსტრუქტაჟის მიღების ნაწილი, მოხდება ფულის გადაცემის ნაწილი და ხელმოწერის ნაწილი მხოლოდ გასაჯაროვდება. ამის იქით, ბუნებრივია ხვდებით, რომ განსაიდუმლოებაც ვერ მოხდება და შეუძლებელია სხვა ნაწილის გამოქვეყნდეს. ერთ ადამიანსაც კი რომ არ მიეცეს სპეკულირების საშუალება და სივრცე არ დარჩეს, ამისი თხოვნა იქნება ჩემი მხრიდან და უახლოეს საათებში თქვენ იხილავთ ამ ვიდეოჩანაწერს," — განაცხადა მდინარაძემ.

შეგახსენებთ, გიორგი უძილაური ფინანსთა სამინისტროს საგამოძიებო სამსახურის ერთ-ერთი სამმართველოს უფროსი იყო. მანამდე კი "ქართუ ჯგუფის" საზოგადოებასთან ურთიერთობის სამსახურის უფროსის პოზიციას იკავებდა.

სახელმწიფო უსაფრთხოების სამსახურმა ბრიფინგზე ითქვა, რომ დაკავებული "უცხო ქვეყნის სპეცსამსახურების ინტერესების სასარგებლოდ სისტემატურად ახორციელებდა ინფორმაციის მოპოვებას და მათთვის გადაცემას".