მთავრობის სხდომის დასრულების შემდეგ გამართულ ბრიფინგზე სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ განაცხადა, რომ 2024 წლის აქციებზე ძალადობის 4 შემთხვევა ბრალდებულების "პირადი ინიციატივა" იყო და დავალება არ მიუღიათ.

"მე შემიძლია გითხრათ, რომ სისხლის სამართლის საქმეში, რომელიც მიმდინარეობს ამ მიმართულებით, არცერთი არა თუ პირდაპირი, არამედ ირიბი მტკიცებულებაც კი არ არის საიმისოდ და იმ დასკვნამდე მისასვლელად, რომ ვინმე აძლევდა დავალებებსს სპეცრაზმელებს იმის შესახებ, რომ მათ ვიღაცისთვის ზიანი მიეყენებინათ და ეცემათ.

აქედან გამომდინარე, ირიბი მტკიცებულების არქონის შემთხვევაშიც კი გამოძიება მოკლებულია შესაძლებლობას, რომ ვინმეზე გავიდეს, ეგრეთ წოდებულ დამკვეთებზე. ეს არის მხოლოდ პიარ კამპანიის ნაწილი მათი მხრიდან, ვისაც დარწმუნებული ვარ, არ ესიამოვნათ სახელმწიფოს სწორი მიდგომა, ეს ერთი. და მეორე — დამკვეთი რომ იყოს ამ საქმეში და შესაბამისი მტკიცებულებაც არსებობდეს, ალბათ დაგვეჯერება ყველას, რომ არ შევიკავებდით თავს. ჩვენ ამისი პრაქტიკა, მათ შორის მაღალი თანამდებობის პირების დაკავებისას, როცა დანაშაულის ნიშნები იყო, გვაქვს ბოლო პერიოდში და ვერავინ დაგვაბრალებს, რომ ვინმეს ვერიდებით, როცა დანაშაული არის სახეზე," — განაცხადა მდინარაძემ.

შემდეგ მდინარაძემ დასძინა, რომ სამართალდამცავების მხრიდან ძალადობას სისტემური ხასიათი რომ ჰქონოდა, "არ იქნებოდა, პირობითად, მხოლოდ ერთი დაზარალებული ჟურნალისტი და იქნებოდა ბევრი".

"აქედან გამომდინარე, თუ იქნება ერთი მტკიცებულება, იმ ერთ მტკიცებულებას ჩავეჭიდებით და გავყვებით, გაყვებიან სამართალდამცველები, მაგრამ თუ ასეთი არ იქნება, ბუნებრივია პიარ კამპანიის ფონზე და საფუძველზე ამას ვერავინ გააკეთებს. როგორც ჩანს, და მტკიცებულებები ამაზე მიუთითებენ, ეს იყო კერძო ინიციატივები და ცალკეული შემთხვევები. მაგალითად, ამას რომ ჰქონოდა სისტემური ხასიათი, არ იქნებოდა პირობითად ერთი დაზარალებული ჟურნალისტი მხოლოდ და იქნებოდა ბევრი და ასე შემდეგ.
აქედან გამომდინარე, ჩვენ მივყვებით რეალობას, სამართალდამცავი უწყებები მიჰყვებიან რეალობას და არა პიარ-კამპანიებს და მტკიცებულებებს," — განაცხადა მამუკა მდინარაძემ.

შეგახსენებთ, 2024 წელს მიმდინარე აქციების დროს ზვიად მოსიაშვილის, ლევან ხაბეიშვილის და გურამ როგავას მიმართ განხორციელებული ძალადობის ფაქტებზე სამი ყოფილი, ერთი მოქმედი სპეცრაზმელი და შსს-ს დაცვის პოლიიიის თანამშრომელი დააკავეს.

დაკავებას წინ უძღვოდა ტელეკომპანია "ფორმულად" ეთერში გასული სიუჟეტი — გადაცემა "ნამდვილი ამბავი ელისო ჯარიაშვილთან" ცნობით, ჟურნალისტ გურამ როგავაზე თავდასხმიდან წელიწადნახევრის შემდეგ, ჟურნალისტ გურამ როგავაზე თავდამსხმელის ვინაობა დაადგინეს.