საქართველოს უზენაესი სასამართლოს და იუსტიციის უმაღლესი საბჭოს თავმჯდომარემ, ნინო ქადაგიძემ ირაკლი კობახიძესთან შეხვედრის შემდეგ მოსამართლეების სანქცირების შესახებ განაცხადა, რომ მოსამართლეები მხოლოდ პროფესიული საქმიანობის გამო სანქცირდებიან და მათ უკანონო "არგუმენტი ვერ იქნა დადებული".

"ვერ ვხსნი იმ მოცემულობას, რომ მოსამართლე შეიძლება დასანქცირდეს მხოლოდ იმის გამო, რომ ის თავის პროფესიულ საქმიანობას ახორციელებს, განსაკუთრებით იმ პირობებსა და ვითარებაში, როდესაც ვერც ერთი დასაბუთებული არგუმენტი ვერ იქნა დადებული რომელიმე გადაწყვეტილების უკანონობის თაობაზე.

სანქცირებულთა სიებში მოსამართლეთა გვარების გამოჩენა მიუთითებს, რომ ზეწოლა უკვე სხვა მიმართულებითაა, სავარაუდოდ, გათვლა კეთდება იმაზე, რომ თვითგადარჩენის ინსტინქტი გაძლიერდეს ინდივიდუალურ მოსამართლეში და ამან უზრუნველყოს ხელისუფლების ერთ-ერთი შტოს შიგნიდან ჩამოშლა" — განაცხადა ნინო ქადაგიძემ.

შეგახსენებთ, დიდმა ბრიტანეთმა "სერიოზულ კორუფციულ საქმიანობაში ჩართვის გამო" თბილისის სააპელაციო სასამართლოს თავმჯდომარეს, მიხეილ ჩინჩალაძეს და იუსტიციის უმაღლესი საბჭოს წევრს, ლევან მურუსიძეს ფინანსური სანქციები დაუწესა.

სანქცირებულ პირებს გაეყინებათ საბანკო ანგარიშები და ყველა სახის ქონება, რაც მათ ბრიტანეთის ტერიტორიაზე აქვთ.

დიდი ბრიტანეთის მიერ სანქცირებულმა მოსამართლემ, ლევან მურუსიძემ "ფორმულასთან" საუბრისას განაცხადა, რომ სანქციების დაწესების მიზანი მხოლოდ უცხო ქვეყნების ინტერესების გატარებაა და "არაფერი კავშირი აქვს კორუფციასთან".

სანქცირებული მოსამართლე საქართველოს რუმინეთს ადარებს და დასძინა, რომ სასამართლოზე გავლენა "უცხო ძალებს" არჩევნების გასაუქმებლად სჭირდებათ.