გამოცემა Reuters-ის ცნობით, ტრამპის ადმინისტრაცია მსოფლიო ჯანდაცვის ორგანიზაციის (WHO) რეფორმაციის გეგმას განიხილავს, რომლის ნაწილად ორგანიზაციის სათავეში ამერიკელის ჩაყენებაც განიხილება — ეს იქნება საფასური, რომელიც ორგანიზაციამ უნდა გადაიხადოს, თუ შემადგენლობაში აშშ-ის დარჩენა სურს.

დოკუმენტი, რომელიც პრეზიდენტ ტრამპის მრჩეველებს 20 იანვრის ინაუგურაციამდე გაუზიარეს, მოიცავდა რეკომენდაციას WHO-დან აშშ-ის დაუყოვნებლივი გამოსვლისა და "ახალი რადიკალური მიდგომის" შესახებ სააგენტოსთან ურთიერთობისთვის — დოკუმენტში ნათქვამია, რომ აშშ უნდა ეცადოს, რომ 2027 წლის ბოლოს, როცა ორგანიზაციის მოქმედი პრეზიდენტის, ტედროს ადჰანომის ვადა ამოიწურება, ახალი პრეზიდენტი ამერიკელი გახდეს.

20 იანვარს ტრამპმა ხელი მოაწერა აღმასრულებელ ბრძანებას, რომლითაც ამერიკამ მსოფლიო ჯანდაცვის ორგანიზაცია დატოვა — მიზეზად ორგანიზაციის მიერ COVID-19-ის პანდემიასა და სხვა გლობალურ ჯანმრთელობის კრიზისებზე არაჯეროვანი და არაეფექტიანი პასუხი დასახელდა. Reuters-ის ინფორმაციით, ჯანმოს ხელმძღვანელად ამერიკელი მაღალჩინოსნის დანიშვნაზე წინადადების გატანა ტრამპის მიერ შერჩეულ სპეციალურ წარმომადგენელს დაევალება.