"ვერ და არ ვუპასუხებ, მხოლოდ, კითხვებს საქმის დეტალებზე. როდესმე, აქედან რო გამოვალ — გიპასუხებთ რა შეკერეს და რა გამოაცხვეს. მარა მხოლოდ მას მერე — რაც სამართლის — სამართლობა აღდგება, შერჩევითი აღარ იქნება, დამნაშავე პოლიციელს, ომონელებს, პროკურორებს და მოსამართლეებს — დავსჯით და აი მერე — მე ვალი მაქვს პასუხები გაგცეთ", — ამის შესახებ ვკითხულობთ პოსტში, რომელიც უჩა აბაშიძის Facebook-ის გვერდზე გამოქვეყნდა (სტილი დაცულია).

5 იანვარს გამოქვეყნებულ პოსტში ბლოგერი წერს, რომ საჯარო აქტიურობას აპირებს და მის მიერ ციხიდან გამოგზავნილ ტექსტებს დედამისი ფეისბუკგვერდზე Shuashsti/შუაშისტი აქვეყნებს.

"თუ თქვენ ამ პოსტს კითხულობთ, ესე იგი დედაჩემი და ადვოკატები, როგორც იქნა, შეთანხმდნენ — რო ჩემი public აქტივობა — საქმეს ვეღარ დააზარალებს. ალილუიაჰ!", — წერს უჩა აბაშიძე (სტილი დაცულია).

ბლოგერის წერს, რომ მისი პირადი ცხოვრება "მოუწესრიგებელი ქაოსია" და იმ ქაოსში მას და მის ცოლს, მარიამ იაშვილს "რაღაც შტერულ გადაცდომას ედავებიან".

"ვერ და არ ვუპასუხებ, მხოლოდ, კითხვებს საქმის დეტალებზე. ნუ ტრეფიკინგი და შანტაჟი/მუქარა რო ტყუილებია გესმით იმედია. მაგას არც მედავებიან. როდესმე, აქედან რო გამოვალ - გიპასუხებთ რა შეკერეს და რა გამოაცხვეს. მარა მხოლომ მას მერე — რაც სამართლის — სამართლობა აღდგება, შერჩევითი აღარ იქნება, დამნაშავე პოლიციელს, ომონელებს, პროკურორებს და მოსამართლეებს — დავსჯით და აი მერე — მე ვალი მაქვს პასუხები გაგცეთ. მანამდე უნდა მენდოთ — რო ჩემი პირადი ცხოვრება, უდავოდ, მოუწესრიგებელი ქაოსია, და მაგ ქაოსში მე და მარიამს გვედავებიან რაღაც შტერულ გადაცდომას", — წერს უჩა აბაშიძე. (სტილი დაცულია).

უჩა აბაშიძის თქმით, ახლა გამხნევება და მხარდაჭერა რეჟიმის პატიმრებს უფრო სჭირდებათ, რადგან პატიმრობის პირველი თვეები ყველაზე რთულია.

"ამ ეტაპზე ანდროს და სხვა ახლებს უფრო უჭირთ - პირველი 3 თვე ყველაზე მძიმეა აქ რა, მერე ეჩვევი და აღარც გახსოვს, როგორია "გარეთ". მანამდე ძალიან გჭამს შიგნიდან ეს შებოჭილი "გდება" და ვერაფრის კეთება. მითუმეტეს - როცა ვინც შენ დაგატყვევა, ნამდვილი მოძალადე კანონდამრღვევები თვითონ არიან, ოფიციალურად "ჰამასის ტყვედ" გრძნობ თავს. მოკლედ, ამ ბიჭებს ახლა ძალიან სჭირდებათ თქვენი გამხნევება. ყველა თქვენი ყურადღება მათ ძალას მატებს — trust me", — წერს უჩა აბაშიძე.

უჩა აბაშიძე 2024 წლის 9 მაისს, მაშინ დააკავეს, როცა დედაქალაქში რუსული კანონის საწინააღმდეგო აქციები იმართებოდა. 11 მაისს დააკავეს მისი ცოლი — მარიამ იაშვილი. პროკურატურის ინფორმაციით, ორივე მათგანს ბრალდება პირადი ცხოვრების საიდუმლოს ხელყოფის მუხლით წარედგინა.

უჩა აბაშიძის ადვოკატი რადიო თავისუფლებასთან ინტერვიუში აცხადებდა, რომ სამხედრო ბლოგერი ხელისუფლების შურისძიების მსხვერპლია. მის საქმეში არის არაერთი დარღვევა, რაც გამოძიების სანდოობას ეჭვქვეშ აყენებს.

ამავე თემაზე:

უჩა აბაშიძის დაკავების შესახებ შსს განცხადებას ავრცელებს

ბლოგერ უჩა აბაშიძისა და მარიამ იაშვილის საქმის პროკურორი: დაკითხულმა მოწმემ სასამართლოს ბრალდების დამადასტურებელი ინფორმაცია მიაწოდა

ბლოგერი უჩა აბაშიძე ამ დრომდე დუმილის უფლებით სარგებლობს