მოკლედ: რუსული კანონის საწინააღმდეგო აქტივისტის, ბლოგერისა და სამხედრო მიმომხილველის, უჩა აბაშიძის დაკავების ფაქტთან დაკავშირებით, შინაგან საქმეთა სამინისტრო აცხადებს, რომ ის დააკავეს იარაღისა და საბრძოლო მასალის უკანონო შეძენა-შენახვის ბრალდებით.

  • პოლიცია უჩა აბაშიძის საცხოვრებელ სახლში 9 მაისის საღამოს, 20:00 საათის შემდეგ შევიდა ჩხრეკის მიზნით, თუმცა მას არ მისცეს უფლება, გამოეყენებინა ტელეფონი და დაკავშირებოდა ადვოკატს.
  • უჩა აბაშიძესთან არ უშვებდნენ არც ოჯახის წევრებს.
  • არ შეუშვეს არც ადვოკატი, რომელიც მალევე მივიდა ადგილზე მას შემდეგ, რაც მედიით გახდა ცნობილი აბაშიძის სახლში პოლიციელთა მისვლის შესახებ.
  • "ადგილზე მისულია არასამთავრობო ორგანიზაციების სამართლებრივი დახმარების ქსელის ადვოკატი, რათა დაიცვას უჩა აბაშიძის ინტერესები და დაესწროს საგამოძიებო მოქმედებებს, თუმცა, უწყება არ აძლევს მას ბინაში შესვლის და მისი დაცვის ქვეშ მყოფ პირთან შეხვედრის შესაძლებლობას. აღნიშნული ცალსახად წარმოადგენს ამ პირის დაცვის უფლების შეზღუდვას, რაც წარმოადგენს სისხლის სამართლის დანაშაულს", — განაცხადა საქართველოს ახალგაზრდა იურისტთა ასოციაციამ.
  • უჩა აბაშიძის მხარდასაჭერად მისული მოქალაქეებიდან რამდენიმე პირი დააკავა პოლიციამ ჭავჭავაძის გამზირზე.

შსს-ს განცხადება: "შსს-ს ცენტრალური კრიმინალური პოლიციის დეპარტამენტის თანამშრომლებმა, სხვადასხვა სამთავრობო უწყების, კერძოდ შსს-ს, იუსტიციის სამინისტროსა და პარლამენტის ვებგვერდებზე განხორციელებული კიბერშეტევის ფაქტებზე გამოძიება სისხლის სამართლის კოდექსის 286-ე მუხლის მე-4 ნაწილით დაიწყეს, რაც კრიტიკული ინფორმაციული სისტემის სუბიექტის მიმართ ჩადენილ კომპიუტერული მონაცემის ან კომპიუტერული სისტემის ხელყოფას გულისხმობს.

  • აღნიშნული გამოძიების ფარგლებში, ჩატარდა და ამ დრომდე მიმდინარეობს საგამოძიებო მოქმედებები თბილისსა და ბათუმში, მათ შორის თბილისში, ი. აბაშიძის #22-ში მდებარე ერთ-ერთ საცხოვრებელ ბინაში, საიდანაც სამართალდამცველებმა ჩატარებული ჩხრეკის შედეგად უკანონო ცეცხლსასროლი იარაღი და საბრძოლო მასალა ამოიღეს.
  • სამართალდამცველებმა სისხლის სამართლის კოდექსის 236-ე მუხლით გათვალისწინებული დანაშაულისთვის, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა შენახვას გულისხმობს, 1984 წელს დაბადებული უ.ა. დააკავეს.
  • გამოძიება გრძელდება სისხლის სამართლის კოდექსის 286-ე მუხლის მე-4 ნაწილით და 236-ე მუხლის მე-3 ნაწილით, რაც კრიტიკული ინფორმაციული სისტემის სუბიექტის მიმართ ჩადენილ კომპიუტერული მონაცემის ან კომპიუტერული სისტემის ხელყოფას და ცეცხლსასროლი იარაღის და საბრძოლო მასალის უკანონო შეძენა-შენახვას გულისხმობს."