ისრაელის თავდაცვის ძალების (IDF) ცნობით, ჰეზბოლას ლიდერი, ჰასან ნასრალა, ლიკვიდირებულია. საჰაერო თავდასხმა 27 სექტემბერს, ბეირუთში, ჰეზბოლას შტაბზე განხორციელდა.

გასული რამდენიმე კვირის განმავლობაში, ისრაელსა და ჰეზბოლას შორის კონფლიქტი ძალიან გამწვავდა, საჰაერო დარტყმებს უკვე 700 ადამიანზე მეტი შეეწირა.

IDF-ის განცხადებით, ავიაციამ ჰეზბოლას ცენტრალურ შტაბზე, რომელიც საცხოვრებელი კორპუსის ქვეშ მდებარეობდა, უზუსტესი იერიში მიიტანა.

"უზუსტესი" დარტყმის მიუხედავად, ლიბანის ჯანდაცვის მინისტრის განცხადებით, თავდასხმას, სულ მცირე, 6 ადამიანის სიცოცხლე ემსხვერპლა, 91 კი დაშავდა. ისრაელის სამხედრო მაღალჩინოსნების განცხადებით, სამიზნე ნასრალა იყო — თავდაპირველად გავრცელდა ხმები, რომ ის გადარჩა. მიუხედავად ამისა, რამდენიმე საათში IDF-მა გაავრცელა განცხადება, რომლის მიხედვითაც ჰეზბოლას ლიდერი, რომელიც ორგანიზაციას 1992 წლიდან მართავდა, ლიკვიდირებულია.

"ჰასან ნასრალა მსოფლიოს ვეღარ დაატერორებს", — აღნიშნულია განცხადებაში

ჰეზბოლა ლიდერის სიკვდილს, ჯერჯერობით, არ ადასტურებს.