აშშ-ს სახელმწიფო და სახაზინო დეპარტამენტების მიერ 16 სექტემბერს საქართველოს დემოკრატიისთვის ძირგამომთხრელ საქმიანობაზე პასუხისმგებელი პირების დასანქცირებას აშშ-ს ჰელსინკის კომისია X-ზე გამოეხმაურა.

"ქართველი ხალხი იმსახურებს ისეთ მთავრობას, რომელიც საკუთარ კანონებს იცავს და ადამიანის თავისუფლებებს პატივს სცემს. ქართველი ხალხის ნების ფეხქვეშ გათელვა ქვეყნის კონსტიტუციასავე ეწინააღმდეგება.

გუშინ აშშ-ს სახელმწიფო დეპარტამენტის მიერ საქართველოს მთავრობის წარმომადგენლებისთვის სანქციების დაწესება ამერიკელების ქართველებისადმი სოლიდარობის დემონსტრაციაა. ქართველებს უნდა შეეძლოთ მშვიდობიანი შეკრების უფლების გამოყენება ისე, რომ თავიანთ ჯანმრთელობასა და სიცოცხლეზე არ ღელავდნენ" — წერს ჰელსინკის კომისია X-ზე.

ცნობისთვის, 16 სექტემბერს აშშ-ს სახელმწიფო და სახაზინო დეპარტამენტებმა საქართველოს დემოკრატიისთვის ძირგამომთხრელ საქმიანობაზე პასუხისმგებელ ათობით პირს სანქციები და სავიზო შეზღუდვები დაუწესეს.

აშშ-ს სახაზინო დეპარტამენტმა "ხარება", იგივე ზვიად ხარაზიშვილი, მისი მოადგილე მილერი ლაგაზაური და პარტია ალტ-ინფოს ლიდერები, კონსტანტინე მორგოშია და ზურაბ მახარაძე დაასანქცირა, ხოლო აშშ-ს სახელმწიფო დეპარტამენტმა სავიზო სანქციები დაუწესა 60 პირსა და მათი ოჯახის წევრებს, რომლებიც საქართველოში დემოკრატიისთვის ძირგამომთხრელ საქმიანობას ეწევიან. სანქცირებულებს შორის არიან მაღალი თანამდებობის პირები მთავრობასა და მუნიციპალიტეტებში, ბიზნესების ხელმძღვანელები, დეზინფორმაციისა გამავრცელებლები, ძალადობრივი ექსტრემიზმის ხელშემწყობები, სამართალდამცველები და პარლამენტის წევრები.