ქალები ვირჩევთ ევროპას! — ქალთა მარში 2024 [ფოტორეპორტაჟი]

რა მოხდა: გუშინ, 20 აპრილს, გაიმართა ქალთა მარში, სახელწოდებით — ქალები ვირჩევთ ევროპას! აქცია-მსვლელობის ორგანიზატორი იყო ქალთა მოძრაობა.

17:00 საათზე მარშის მონაწილეები პირველი რესპუბლიკის მოედანზე შეიკრიბნენ და მსვლელობით, საქართველოს პარლამენტის შენობასთან გადაინაცვლეს.

**ქალთა მარში — ქალები ვირჩევთ ევროპას. 20 აპრილი, 2024 წელი**

ფოტო: მარიამ მერლანი/ On.ge

პარლამენტის შენობასთან მისვლის შემდეგ, რუსთაველის გამზირი გადაიკეტა, შეკრებილებს კი აქციის ორგანიზატორებმა სიტყვით მიმართეს.

**ბაია პატარაია — 20 აპრილი, 2024 წელი**

ფოტო: მარიამ მერლანი/ On.ge

ნანა მალაშხია — 20 აპრილი, 2024 წელი — **ბაია პატარაია — 20 აპრილი, 2024 წელი**

ფოტო: მარიამ მერლანი/ On.ge

"ქართული ოცნება დღეს მოგვევლინა ქართულ კოშმარად, რომელმაც გადალახა ყველა წითელი ზღვარი. თუმცა, ჩვენ ამ დღეებში მომსწრე ვართ ერთიანი, ძლიერი, თავისუფალი, ევროპული საქართველოს დაბადებისაც.
შარშან, მარტში, ახალგაზრდებმა გაიმარჯვეს, ისინი ახლაც აქ არიან, გაიმარჯვებენ და გავიმარჯვებთ ჩვენ, მათთან ერთად, იმიტომ, რომ სიმართლე ჩვენს მხარესაა, ჩვენ გვაერთიანებს ევროპული და თავისუფალი საქართველოს იდეა", — თქვა ნანა მალაშხიამ სიტყვით გამოსვლისას.

ქალთა მარშის მონაწილეები, რუსული კანონის გარდა, პარლამენტში გენდერული კვოტების გაუქმებასაც აპროტესტებდნენ.

რედაქციისგან: რატომ გვჭირდება გენდერული კვოტირების პოლიტიკა — პოზიციები და ანალიზი

საქართველოს პარლამენტის შენობასთან შეკრებილები, ქალთა მარშის დასრულების შემდეგ, 19:00 საათზე, შეუერთდნენ ახალგაზრდების მიერ დაორგანიზებულ პროტესტს რუსული კანონის წინააღმდეგ.

**ახალგაზრდების პროტესტი რუსული კანონის წინააღმდეგ — 20 აპრილი, 2024 წელი**

ფოტო: მარიამ მერლანი/ On.ge

პარლამენტის შენობიდან, დემონსტრანტები მივიდნენ საქართველოს პრეზიდენტის ორბელიანების სასახლესთან. ისინი სკანდირებდნენ არა რუსულ კანონს! ჩვენ გვინდა ევროპა!

20 აპრილს ქალთა მარში ასევე გაიმართა ქუთაისში, გორში, მარნეულში, ახმეტაში, ბოლნისში, ბათუმში, ოზურგეთში და წნორი.

კონტექსტი: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს, საკანონმდებლო ინიციატივის საპარლამენტო განხილვების პარალელურად.

16 აპრილს, მთავრობამ სპეცრაზმის ძალის გამოყენებით დაარბია მშვიდობიანი პროტესტის მშვიდობიანი დემონსტრანტები და დამოუკიდებელი მედიის ჟურნალისტები.
აქციები არა მხოლოდ თბილისში, არამედ საქართველოს სხვადასხვა რეგიონშიც იმართება.
რუსული კანონის საწინააღმდეგო აქციებში აქტიურად არიან ჩართულები ახალგაზრდებიც.
რატომ არის ქართული ოცნების კანონი რუსული — მოკლედ და მარტივად

რუსული კანონის ქრონოლოგია:

2024 წლის 3 აპრილი

ოცნებამ განაცხადა, რომ ისევ აპირებს იმავე რუსული კანონის კანონის მიღებას, რამაც მასშტაბური სახალხო წინააღმდეგობა გამოიწვია გასული წლის მარტში.

8 აპრილი

პარლამენტის ბიუროს სხდომაზე განხილვის შემდეგ, რუსული კანონი დარეგისტრირდა.
პარლამენტში თქვეს, რომ კანონის განხილვას პარლამენტის იურიდიული კომიტეტი 15 აპრილს დაიწყებს.
ამას წინ უძღოდა საპროტესტო აქცია პარლამენტის შენობის უკან.
შესაბამისი ნებართვის მიუხედავად, პარლამენტში არ შეუშვეს დამოუკიდებელი მედიის ნაწილი.
პრეზიდენტის საპარლამენტო წარმომადგენელმა განაცხადა, რომ სალომე ზურაბიშვილი ვეტოს დაადებს კანონს.
გავრცელდა 400-ზე მეტი ორგანიზაციის განცხადება, მიმართვით — კი ევროპას, არა რუსულ კანონს!
დამოუკიდებელმა მედიასაშუალებებმა ერთობლივად განვაცხადეთ, რომ ქართულ ოცნებას არ მივცემთ რუსული კანონის მიღების საშუალებას.