აშშ-სა და ირანს შორის საპასუხო სამხედრო დარტყმებისა და საუდის არაბეთზე "ჰუსიტების" უწყვეტი თავდასხმების ფონზე, ოთხშაბათს Brent-ის ტიპის ნავთობის ფასმა ბარელზე 100 დოლარს გადააჭარბა, WTI-ს ტიპის ნავთობმა კი — 95 დოლარს.

შესაბამისად, ნავთობის ღირებულება ივლისის ბოლოს ირანსა და აშშ-ს შორის ცეცხლის შეწყვეტის შეთანხმების ჩაშლის შემდეგ ყველაზე მაღალ ნიშნულზეა. როგორც BBC წერს, ანალიტიკოსების შეფასებით, რეგიონში ვითარების ნებისმიერი ახალი გამწვავება ფასების შემდგომ ზრდას გამოიწვევს.

ცნობისთვის, საპასუხო დარტყმების სერიის ფარგლებში, აშშ-მა ირანის მიერ ამერიკულ სამხედრო ხომალდზე განხორციელებული შეტევის გამო შურისძიების ნიშნად ხუთ ირანულ ტანკერს დაარტყა. აშშ-ის ცენტრალური სარდლობის (Centcom) ცნობით, სამიზნეში ამოღებული ხომალდები "მრავალმილიარდიანი ჩრდილოვანი ქსელის" ნაწილს წარმოადგენდა, რომელიც ისლამური რევოლუციის გუშაგთა კორპუსსა (IRGC) და მის რეგიონულ მარიონეტულ დაჯგუფებებს აფინანსებს.

ერთ-ერთი ირანული ტანკერი M/T Riesco ომანის ყურეში ჩაიძირა, კიდევ ერთს კი ირანის ნავთობის ექსპორტის მთავარ ჰაბთან, კუნძულ ხარგთან მიაყენეს დარტყმა.

საპასუხოდ, თეირანმა რაკეტები ისროლა იორდანიაში მდებარე ამერიკულ ბაზაზე (რომელთა უმეტესობაც ჩამოაგდეს) და განაცხადა, რომ ჰორმუზის სრუტეში ორ ამერიკულ ხომალდსა და რვა ნავთობის ტანკერს დაესხა თავს.

BBC წერს, რომ კონფლიქტის პარალელურად, ვითარება გამწვავებულია წითელ ზღვასა და საუდის არაბეთშიც. ირანის მიერ მხარდაჭერილმა "ჰუსიტების" მოძრაობამ ენერგეტიკულ ობიექტებსა და სამოქალაქო ინფრასტრუქტურაზე მიიტანა იერიში, რის შედეგადაც 73 ადამიანი დაშავდა. დრონებითა და რაკეტებით განხორციელებულმა შეტევამ ნავთობობიექტებზე ხანძარი და ოპერაციების დროებითი შეჩერება გამოიწვია.

ნავთობის ბაზარზე რყევები მიმდინარე წლის 28 თებერვალს დაიწყო, მას შემდეგ რაც აშშ-მა და ისრაელმა ირანზე დარტყმები დაიწყეს. ომის შედეგად ფაქტობრივად ჩაიკეტა ჰორმუზის სრუტე, რომელზეც მსოფლიო ნავთობისა და გათხევადებული ბუნებრივი აირის (LNG) 20% გადის. ომამდე Brent-ის ფასი $70-ის ფარგლებში მერყეობდა, არსებულმა ესკალაციამ კი მსოფლიოს მასშტაბით საწვავის ფასების მკვეთრი ზრდა გამოიწვია.