რა ხდება: დღეს, 2024 წლის 9 აპრილს, თბილისში თავისუფლების მარში იმართება.

  • ეს არის მსვლელობა რუსული კანონის წინააღმდეგ, რომელიც დაიგეგმა გუშინ, 8 აპრილს, მას შემდეგ, რაც საპარლამენტო უმრავლესობამ ანტიდასავლური კანონი პარლამენტში ხელახლა დაარეგისტრირა.

  • მარშის ორგანიზატორები საქართველოში მოქმედი არასამთავრობო ორგანიზაციები არიან.

  • პროტესტის გამოსახატად, მოქალაქეებმა შეკრება 18:00-ზე, რესპუბლიკის მოედანთან დაიწყეს და მსვლელობა საქართველოს პარლამენტის მიმართულებით გაგრძელდა.

თავისუფლების მარშის ძირითადი გზავნილებია: ევროპული მომავლისთვის!; ჩვენ ვირჩევთ ევროპას, საქართველო არასდროს იქნება რუსეთი!; ერთად დავიცვათ 9 აპრილის მონაპოვარი!; კი ევროპას! არა რუსულ კანონს.

კომენტარები

მსვლელობისას, On.ge მარშის მონაწილეებს ესაუბრება. ისინი აღნიშნავენ, რომ ამ დღის ძირითადი გზავნილია კი ევროპას, არა — რუსულ კანონს.

გია ჯაფარიძე: "არა რუსეთს — ეს გზავნილი იყო 35 წლის წინ [1989 წლის 9 აპრილს] და არის დღესაც. არა რუსულ კანონს, რომელიც მეორედ დააინიციირა რუსული დღის წესრიგის მქონე მმართველმა პარტიამ", — გვითხრა დიპლომატმა, GRASS-ის და GSAC-ის უფროსმა მკვლევარმა.

"ეს კანონი, არის თავისი შინაარსით, თავიდან ბოლომდე რუსული. ყველა სიტყვა, ყველა წერტილი თუ მძიმე მასში რუსულია და ეწინააღმდეგება საქართველოს ევროპულ მისწრაფებებს; ეწინააღმდეგება საქართველოს მოქალაქეების ნებას, ეწინააღმდეგება ჩვენს სურვილს, ვცხოვრობდეთ კეთილდღეობისა და მშვიდობის სივრცეში. ეს არის კანონი, რომელიც მიმართულია ჩვენი საერთაშორისო პარტნიორების წინააღმდეგ; ეს არის კანონი, რომელსაც მხარს უჭერს მხოლოდ რუსეთი და ეს, პესკოვმა, გააჟღერა კიდეც თავისი პირით."

  • ჯაფარიძეს მხედველობაში აქვს რუსეთის პრეზიდენტის პრესსპიკერის, დმიტრი პესკოვის მიერ, 4 აპრილს გაკეთებული განცხადება, რომ "მათ, ვისაც მწვავე და მკვეთრი რეაქცია აქვს, უფრო აქტიურად უნდა ავუხსნათ, რომ აბსურდია ამის რუსულ პროექტად მიჩნევა".

სიმონ ჯანაშია: "ეს კანონი გვაახლოებს რუსეთთან და გვაშორებს დემოკრატიულ სამყაროსთან და ამიტომაც ეძახის ხალხი რუსულ კანონს. ამიტომაც უნდა დავუპირისპირდეთ. ასევე, ამ კანონის მიღების პროცესი გვაჩვენებს იმას, რომ ჩვენ გვყავს ხელისუფლება, რომელსაც არ შეიძლება, რომ ვენდოთ; საკუთარ ნათქვამსა და პირობას ისე გადათქვამდნენ, თითქოს, არ არსებობდეს არც ღირსება, არც ხალხის წინაშე ანგარიშვალდებულება. მგონია, რომ არა მხოლოდ ამ კანონს, ზოგადად, ხელისუფლებას უნდა შევეწინააღმდეგოთ და ვიპოვოთ ის ახალი ხალხი, ვისაც შეიძლება ვენდოთ და ვანდოთ გადაწყვეტილებების მიღება და მომავალიც", — თქვა On.ge-სთან ისტორიკოსი და განათლების ექსპერტი.

მსვლელობაში ოპოზიციური პოლიტიკური პარტიის რამდენიმე ლიდერიც მივიდა.