პარტია გახარია საქართველოსთვის ერგნეთში გამართული IPRM-ის 134-ე შეხვედრაზე ჩორჩანას საგუშაგოს საქმის განხილვის დეტალების გასაჯაროებას ითხოვს.

8 სექტემბერს გორის მუნიციპალიტეტის სოფელ ერგნეთში ინციდენტების პრევენციისა და მათზე რეაგირების მექანიზმის (IPRM) 134-ე შეხვედრა გაიმართა.

სუს-ის ინფორმაციით, შეხვედრაზე განიხილეს თავისუფალი გადაადგილების უკანონო შეზღუდვისა და ე.წ. გადასასვლელ პუნქტებზე არსებული რეჟიმის საკითხი. უწყების განცხადებით, სუს-ის წარმომადგენლებმა კვლავ მკაცრად დააყენეს საქართველოს მოქალაქის თამაზ გინტურის მკვლელობის საკითხი. განცხადებაში ჩორჩანას საგუშაგო არ არის ნახსენები.

შეგახსენებთ, რომ თამაზ გინტური — საქართველოს შეიარაღებული ძალების ვეტერანი — 2023 წლის 6 ნოემბერს, გორის მუნიციპალიტეტის სოფელ კირბალთან, საოკუპაციო ხაზის მიმდებარედ, რუსეთის საოკუპაციო ძალების წარმომადგენლებმა მოკლეს. ის ადგილობრივ მცხოვრებ ლევან დოთიაშვილთან ერთად ლომისის წმინდა გიორგის ეკლესიაში მიდიოდა, რომლის კარიც რუს ოკუპანტებს აჭედილი ჰქონდათ. ტაძართან რუსულმა სამხედროებმა მათ ცეცხლი გაუხსნეს — გინტური ზურგში მიყენებული ცეცხლსასროლი ჭრილობებით გარდაიცვალა, ხოლო დოთიაშვილი გაიტაცეს (მოგვიანებით გაათავისუფლეს).

პარტიის მტკიცებით, უსაფრთხოების სამსახური საზოგადოებას საგუშაგოსთან დაკავშირებით ინფორმაციას შეგნებულად უმალავს და მისთვის უცნობია, თუ რას აპირებს მმართველი პარტია.

პარტია მიიჩნევს, რომ ამ თემაზე ქართული ოცნების დუმილი აჩენს ეჭვს, რომ ქართული მხარე მზადაა, საგუშაგო აიღოს. პარტია ხელისუფლებას მოუწოდებს, დაუყოვნებლივ მიაწოდოს საზოგადოებას ინფორმაცია ჩორჩანას საგუშაგოსთან დაკავშირებით.

"საოკუპაციო რეჟიმი უსინდისოდ ცდილობს ჩორჩანას ტერიტორია საკუთარ მიწად გაასაღოს, ხოლო ქართული ოცნება ამ ყველაფერს დუმილით ხვდება და საზოგადოებას უმალავს ინფორმაციას როგორც ცხინვალის რეჟიმის მოთხოვნებზე, ისე საკუთარ საპასუხო პოზიციაზე.
იმის ნაცვლად, რომ ხელისუფლება ეროვნულ ინტერესებს იცავდეს, ქართული ოცნება ასამართლებს საქართველოს ყოფილ შინაგან საქმეთა მინისტრს ჩორჩანაში ქართული პოლიციის საგუშაგოს განთავსებისა და ქართული მიწის მცოცავი ოკუპაციისგან დაცვის გამო.

ქართული ოცნების უწყვეტი დუმილი ჩორჩანასთან დაკავშირებით აჩენს მძიმე ეჭვებსა და შეშფოთებას ხელისუფლების შესაძლო მზაობაზე, ჩაიდინოს ღალატის უპრეცედენტო აქტი და ქართული მიწები საოკუპაციო რეჟიმს დაუთმოს. იმ შემთხვევაში, თუ ქართული ოცნების ხელისუფლება ჩორჩანას საპოლიციო საგუშაგოს აიღებს, ეს იქნება სამშობლოს ღალატი, რომელიც სისხლის სამართლის დანაშაულია და ამ აქტში მონაწილე თითოეული პირი პასუხს აგებს კანონისა და ისტორიის წინაშე.

მოვუწოდებთ ხელისუფლებას, დაუყოვნებლივ მიაწოდოს ინფორმაცია ქართველ ხალხს ჩორჩანასთან დაკავშირებით საკუთარი განზრახვების შესახებ და ვაფრთხილებთ ქართულ ოცნებას, არ გადადგას არცერთი ნაბიჯი, რომელიც საოკუპაციო ძალებისთვის ქართული ტერიტორიების დათმობას დაუშვებს," — წერს პარტია.

შეგახსენებთ, 2025 წელს 13 ნოემბერს სასამართლომ დააკმაყოფილა პროკურატურის შუამდგომლობა და ე.წ ჩორჩანას ეპიზოდზე ყოფილ პრემიერმინისტრს, გიორგი გახარიას პატიმრობა დაუსწრებლად შეუფარდა. პროკურატურის განმარტებით, საშიშროებაა ახალი დანაშაულის ჩადენის, მოწმეებზე ზემოქმედების და მიმალვის. გადაწყვეტილება მოსამართლე დავით კურტანიძემ მიიღო. გიორგი გახარია სასამართლო სხდომას არ დასწრებია. მან საქართველო გასული წლის ივნისში დატოვა.