რუსეთის შეიარაღებული ძალების მოხალისეთა ინტერნაციონალური დანაყოფის, "გეორგიევსკის" მეთაურმა, საქართველოს ყოფილმა გენერალურმა პროკურორმა, ოთარ რომანოვ-ფარცხალაძემ რუსულ სამთავრობო მედია TASS-ს განუცხადა, რომ დასავლური სანქციებით ამაყობს.

"ჩემი მთავარი პრინციპი ყოველთვის ერთი იყო — სამართლიანობა, წესრიგი და დისციპლინა. სწორედ ჩემი სიმართლისმოყვარეობის, მკაცრი პატრიოტული პოზიციისა და დასავლეთის წესებით თამაშზე უარის თქმის გამო გავხდი უპრეცედენტო ზეწოლის ობიექტი. ორჯერ შემიყვანეს აშშ-ის, ევროკავშირისა და დიდი ბრიტანეთის სანქციების სიებში. მაგრამ ჩემთვის ეს სანქციები სიმართლისთვის მიღებული ორდენებია", — განაცხადა მან.

რომანოვ-ფარცხალაძემ აღნიშნა, რომ უკრაინაში ომის დაწყების შემდეგ განზე ვერ დარჩებოდა და გადაწყვიტა, დახმარებოდა რუს სამხედროებს, ასევე დონბასისა და უკრაინის მოსაზღვრე რუსეთის რეგიონების მცხოვრებლებს.

"2025 წლის 9 მაისს, გამარჯვების აღლუმზე უმაღლესი მთავარსარდლის, ვლადიმერ პუტინის მიწვევის შემდეგ, მტკიცედ გადავწყვიტე და მოხალისეთა კორპუს "არბატში" ვიმსახურე, სადაც ცხრა თვე გავატარე. "არბატში" სამსახურის დასრულების შემდეგ კი მე და ჩემმა თანამოაზრეებმა ინტერნაციონალური მოხალისეთა დანაყოფის, "გეორგიევსკის", შექმნა გადავწყვიტეთ“, — აღნიშნა მან.

მისი თქმით, "გეორგიევსკში" ერთიანდებიან მოხალისეები, რომლებიც აფასებენ რუსეთისა და საქართველოს საერთო ისტორიას და "საუკუნოვან ძმობას".

"მათი მთავარი მოტივაციაა ქრისტიანული სარწმუნოების, ტრადიციული ოჯახის, საკუთარი კულტურისა და იდენტობის დაცვა იმ სიგიჟისა და ზეწოლისგან, რომელსაც დღეს დასავლეთი თავს გვახვევს. მათთვის რუსეთი ნორმალური, ჯანსაღი ადამიანური ღირებულებების საყრდენია და მათ მტკიცედ გადაწყვიტეს, ეს საყრდენი იარაღით ხელში დაიცვან", — დასძინა მან.

მანამდე რომანოვ-ფარცხალაძემ TASS-ს განუცხადა, რომ რუსეთში ინტერნაციონალური დანაყოფი "გეორგიევსკი" ჩამოყალიბდა. მისი თქმით, სახელწოდება დაკავშირებულია 1783 წლის გეორგიევსკის ტრაქტატთან, რომელმაც, მისი შეფასებით, მნიშვნელოვანი როლი ითამაშა ქართველი ხალხის ისტორიაში.

რუსულმა მედიამ 7 სექტემბერს გაავრცელა ცნობა იმის შესახებ, რომ რუსეთში უკრაინის წინააღმდეგ ომში მონაწილეობის მისაღებად მოხალისეობრივი ინტერნაციონალური დანაყოფი "გეორგიევსკი" ჩამოყალიბდა, რომლის მეთაური საქართველოს ყოფილი გენერალური პროკურორი და რუსეთის მხარეს მებრძოლი ომარ რომანოვ-ფარცხალაძეა.

შეგახსენებთ, რომ 2025 წლის დეკემბერში საქართველოს შინაგან საქმეთა სამინისტრომ იგი ლევან ჯანგველაძის მკვლელობის ორგანიზატორად დაასახელა, რის შემდეგაც მის მიმართ ძებნა გამოცხადდა. 2026 წლის თებერვალში სასამართლომ მას ამ საქმეზე დაუსწრებლად პატიმრობა შეუფარდა.

გარდა ამისა, მას ბრალი აქვს წარდგენილი ე.წ. ქოლ-ცენტრების საქმეზეც და ამ საქმეზეც დაუსწრებლად პატიმრობა აქვს შეფარდებული.

ამჟამად ფარცხალაძე რუსეთში იმყოფება და რუსეთის მოქალაქეა, რის გამოც მისი საქართველოში ექსტრადირების საკითხი გართულებულია.