პარლამენტის თავმჯდომარე შალვა პაპუაშვილი ბრიფინგზე უფლებადამცველ ლაზარე ჯორბენაძის თვითმკვლელობის საქმესაც გამოეხმაურა. მისი შეფასებით, "ასავალ-დასავალთან" ინტერვიუში ჯორბენაძის მიერ გაჟღერებული ბრალდებები დავით გარეჯის ტერიტორიის ნაწილის გასხვისებასთან დაკავშირებით "ცილისწამება და ბოდვაა".

"ერთი წუთით მაინც გჯერათ, როდესაც ჯერ თავის დროზე, ის ადამიანი, სანამ ცოცხალი იყო, ამბობდა, რომ მას აქვს რაღაც საიდუმლო კოდები, რომლითაც სადღაც შედის და რაღაცებს იღებს, ხოლო რაღაცებს არ გაჩვენებთ და ეს მის თავში არის და ეს ყველაფერი... ახლახან გამოქვეყნდა PISA-ს შედეგები, სადაც ლიდერები ვართ გაუმჯობესების კუთხით, მეცნიერების მიმართულებით და ასე შემდეგ. ეს შეეხება იმას, რომ ადამიანებს საღი განსჯა გვაქვს, საზოგადოებას, მოქალაქეებს და ვხვდებით, რომ ეს არის ცილისწამება. ამ ადამიანმა თვითმკვლელობით თავზე სხვა ცოდვაც დაიდო და ისე წავიდა ამ ქვეყნიდან, ცილი დასწამა ადამიანებს თუ ადამიანს ამ აბსოლუტურად აბსურდული განცხადებაც არ ჰქვია ამას, ეს არის ჭორი. ჭორიც არ არის, ეს არის ზღაპარი, რომელსაც გვიყვებიან. მთელი უბედურება რაში არის, იცით? რომ ყველამ, აბსოლუტურად ყველამ, მათ შორის იმ "ახალ-დასავალის" ჟურნალისტებმაც, ყველამ ძალიან კარგად იცის, რომ ეს იყო ბოდვა, ეს იყო ცილისწამება, რომელიც იყო ბოდვის ხასიათის. ბოდვა, აბსოლუტურად.

...ამ ბოდვის შემდეგ, ეს ადამიანი ცოცხალი არ არის და ახლა მის ამ ნაბოდვარს იყენებენ იმისთვის, რომ რაღაც ტირაჟირება მოახდინონ. ეს არის აბსოლუტური უსინდისობა, უპირველეს ყოვლისა, იმ გარდაცვლილი ადამიანის მიმართ, როდესაც მის სულს არ ასვენებენ იქაც და მის ცილისწამებას იმიტომ იმეორებენ, რომ ამით მის სულს კიდევ ზიანს აყენებენ.

...ჩვენ რასაც ვისმენთ, ხო გახსოვთ: "კოდები მაქვს, საიდუმლო კოდებიო, სადღაც ჩუმად შევდივარო, რაღაცები ავიღე, რაღაც ფურცლები მაქვსო". შემდეგ ახლა მისი ვითომ მეგობრები, რომლებიც სინამდვილეში მისი ყველაზე დიდი მტრები არიან, ამბობენ, რომ "ეს ფურცლები ასე შორიდან დამანახაო". აი, ასეთ ტონზე, როგორ შეიძლება ან ჟურნალისტიკა დაეშვას, ან ადამიანი დაეშვას?", — განაცხადა შალვა პაპუაშვილმა ბრიფინგზე.

შეგახსენებთ, რომ ექსპრემიერი ღარიბაშვილი 1-ელ სექტემბერს ციხიდან გამოქვეყნებულ რიგით მე-5 წერილში უფლებადამცველ ლაზარე ჯორბენაძის გარდაცვალების გარემოებების და რეალური მიზეზის გარკვევას ითხოვს.

რაც შეეხება ლაზარე ჯორბენაძეს, ის პოლიტიკური აქტივისტი და უფლებადამცველი იყო და 2026 წლის აპრილში გარდაიცვალა. საქმეზე თვითმკვლელობის ვერსია განიხილება, თუმცა მის ახლობლებს, თანაპარტიელებსა და საზოგადოების ნაწილს ამის არ სჯერათ და მიიჩნევენ, რომ გაურკვეველ ვითარებაში გარდაიცვალა.

სიკვდილამდე ცოტა ხნით ადრე, ლაზარე ჯორბენაძემ გაზეთ "ასავალ-დასავალში" გამოაქვეყნა ინტერვიუ, სადაც ამტკიცებდა, რომ პრემიერმა ირაკლი კობახიძემ აზერბაიჯანის პრეზიდენტ ილჰამ ალიევთან საიდუმლო შეთანხმებას მოაწერა ხელი, რომლითაც აზერბაიჯანს დავით გარეჯის ტერიტორიის ნაწილი გადასცა და მას ამის დამადასტურებელი დოკუმენტი ჰქონდა.

მეტი ლაზარე ჯორბენაძის საქმეზე: