ქუთაისის სააპელაციო სასამართლომ ჯგუფურ ძალადობაში ბრალდებული ჭიათურელი მაღაროელების განაჩენი ძალაში დატოვა. გადაწყვეტილება მოსამართლე ნიკოლოზ მარგველაშვილმა მიიღო.

20 იანვარს ქუთაისის საქალაქო სასამართლომ 4 ჭიათურელი მაღაროელი დამნაშავედ ცნო და თავისუფლების აღკვეთა მიუსაჯა. მაღაროელებს 2025 წლის 28 აპრილის ღამეს მომხდარი ინციდენტის გამო ედავებოდნენ, როდესაც პროტესტის მონაწილეები და შუქრუთის მაღაროს დირექტორი, თენგიზ კობერიძე ერთმანეთს დაუპირისპირდნენ.

ჯგუფური ძალადობის ორგანიზებით და მასში მონაწილეობისთვის დაკავებულ გიორგი ნეფარიძეს და მერაბ სარალიძეს 6 წლითა და 3 თვით პატიმრობა მიესაჯათ. ჯგუფურ ძალადობაში მონაწილეობის ბრალდებით დაკავებულ არჩილ ჭუმბურიძეს და თენგიზ გველესიანს — 4 წლითა და 3 თვით თავისუფლების აღკვეთა.

გარდა ჯგუფური ძალადობის ბრალდებისა, გიორგი ნეფარიძეს მოსამართლის შეურაცხყოფისთვის 1 წლით და 6 თვით პატიმრობა აქვს მისჯილი. საქმე ეხება 12 სექტემბრის სასამართლო პროცესს, როცა სასამართლო პროცესზე ბრალდების მხარის ერთ-ერთი მოწმე იკითხებოდა, რა დროსაც ნეფარიძე მას მოუწოდებდა ცრუ ჩვენება არ მიეცა. მოსამართლე თამარ მაზანაშვილმა აღნიშნული რეპლიკისთვის ბრალდებული სასამართლო დარბაზიდან გააძევა, რის დროსაც მან მოსამართლეს მიმართა სიტყვებით — "დაახვიე [განჩინება] და ერთ ადგილას გაიკეთე". ნეფარიძისთვის მისჯილმა წინა ბრალდებამ აღნიშნული სასჯელი არ შთანთქა.

მაღაროელების დაკავებას წინ უძღვის ხანგრძლივი პროტესტი. უკვე თითქმის წელიწადნახევარია ჭიათურელები მთავრობის წარმომადგენლებთან შეხვედრას, სამუშაო პირობების გაუმჯობესებას და სახელფასო დავალიანების დაფარვას ითხოვენ.