პარლამენტის თავმჯდომარე შალვა პაპუაშვილი ექსპრემიერ ირაკლი ღარიბაშვილის ციხიდან გამოგზავნილ ბოლო წერილს გამოეხმაურა, სადაც ის შალვა პაპუაშვილს მიმართავს, რომ "ეს არ არის სამართლებრივი პროცესი — ეს არის დაუნდობელი პოლიტიკური დევნა!"

პაპუაშვილი ამბობს, რომ "სამართლებრივ პროცესს სჭირდება სამართლებრივი პასუხები. და ნებისმიერი მცდელობა ყურადღების გადატანისა პოლიტიკური ინსინუაციებით, თავისთავად არის განწირული".

"ვერ გეტყვით რატომ ვიყავი [ნახსენები წერილში]. როგორ გითხრათ ახლა, სხვა ადამიანმა რატომ გადაწყვიტა, მე ამას ვერ გეტყვით. თუმცა ჩემი პასუხი იგივე არის, რომ სამართლებრივ პროცესს სჭირდება სამართლებრივი პასუხები. და ნებისმიერი მცდელობა ყურადღების გადატანისა პოლიტიკური ინსინუაციებით, თავისთავად არის განწირული. ვის არ უცდია, რომ სასამართლოში განსახილველი საკითხები გადაეტანა პოლიტიკურ ინსინუაციებზე?! სავსე გვაქვს ასეთი მაგალითებით და ყველგან გამოცდილება ხომ გვაჩვენებს, რომ ამას არანაირი შედეგი არ აქვს", — ამბობს პაპუაშვილი.

ჟურნალისტის კითხვაზე — გჯერათ, რომ შეიძლება "დიფ სთეითის" გავლენა ახლა ღარიბაშვილისკენ წავიდეს?, პაპუაშვილი ამბობს, რომ საქმის "პოლიტიზება არ არის საჭირო".

"მე ვფიქრობ, რომ ის ბრალი, რაც მას აღიარებული აქვს უკვე და ის ბრალი, რაც მას წარდგენილი აქვს, საკმარისზე მეტად მძიმეა იმისთვის, რომ დღეს სხვა საკითხებზე იყოს საუბარი. სამართლებრივ პროცესს სჭირდება სამართლებრივი პასუხები.

...რახან ვამბობ, რომ პოლიტიზება არ არის საჭირო და ის, რომ ცდილობს გადაიტანოს სამართლებრივი საკითხები პოლიტიკურ ჭრილში, არ არის სწორი, ამიტომ ამ მცდელობის აყოლაც არ არის სწორი. სამართლებრივი პროცესი არის და ვფიქრობ, რომ მშვიდად უნდა დავაკვირდეთ სასამართლო პროცესს და სასამართლო ობიექტურად განსჯის ამ საკითხს და მიიღებს გადაწყვეტილებას", — თქვა პაპუაშვილმა.