ილონ მასკის უფროსმა შვილმა, ვივიან უილსონმა, ესპანური მოდის ბრენდი Desigual-ის ხელოვნური ინტელექტის საწინააღმდეგო კამპანიაში მიიღო მონაწილეობა. მოდელი, აქტივისტი და ინფლუენსერი AI-ს წინააღმდეგ თავის პოზიციას ღიად გამოთქვამს.

კამპანიას დაუმორჩილებლობისთვის დაბადებული (Born to Disobey) ჰქვია. მის ვიდეორგოლში ჩანს 22 წლის ვივიანი, რომელიც რობოტს გოლფის ბურთის დასადებად იყენებს, საბელით დაბმულს ასეირნებს და ცდილობს ასწავლოს სიტყვა Desigual-ის თქმა. მთელი ვიდეოს განმავლობაში რობოტი ხარვეზებით მუშაობს, რასაც ვივიანი მიჰყავს დასკვნამდე — "ზოგიერთი რამ გამოსასწორებლად არ არის შექმნილი".

კამპანიის მიზანია გაავრცელოს იდეა, რომ "ყველაზე დიდი ამბოხი უკვე არა სისტემის წინააღმდეგ ბრძოლა, არამედ მასში მონაწილეობაზე უარის თქმაა".

უილსონმა განაცხადა, რომ მისთვის მნიშვნელოვანია ხელოვნური ინტელექტის შესახებ საკუთარი პოზიციის დაფიქსირება, "რადგან ის ნიჭიერ შემოქმედებს ართმევს სამუშაო ადგილებს და ამავდროულად აზიანებს გარემოს".

AI-სთან დაპირისპირების გარდა, რთულია კამპანიაში არ შეამჩნიო ილონ მასკის შეფარული კრიტიკაც. ვივიანს მამასთან ურთიერთობა გაწყვეტილი აქვს, ილონი კი ტრანსგენდერ მოდელს გარდაცვლილადაც კი მოიხსენიებს.

ამ კონტექსტში, Desigual-ის კამპანიის ისეთი ფრაზები, როგორიცაა "ის შექმნილი იყო დასამორჩილებლად. მე კი — არა" და "ზოგიერთი რამ გამოსასწორებლად არ არის შექმნილი", სრულიად ახალ მნიშვნელობას იძენს და არა მხოლოდ ხელოვნური ინტელექტს, არამედ მამასაც უპირისპირდება.

გარდა ამისა, კამპანიის სარეკლამო ვიდეოში ნაჩვენები გაუმართავი და სრულიად უსარგებლო რობოტი, სახელად DESI84, საკმაოდ ჰგავს ილონ მასკის კომპანიის მიერ წარდგენილ Tesla-ს რობოტს (Tesla Optimus).