ბათუმიდან აფრენილი კერძო ვერტმფრენი თურქეთში, რიზეს პროვინციის სანაპიროსთან, ზღვაში ავარიულად დაეშვა — ინფორმაციას Reuters თურქეთის შინაგან საქმეთა სამინისტროზე დაყრდნობით ავრცელებს.

გავრცელებული ინფორმაციით, ვერტმფრენი ჩრდილოეთ თურქეთში მდებარე ორდუ-გირესუნის აეროპორტისკენ მიფრინავდა და ძრავის გაუმართაობის გამო ავარიულად დაეშვა. განგაშის სიგნალის მიღებისთანავე, თურქეთის სანაპირო დაცვის ჯგუფები მითითებულ კოორდინატებზე ოპერატიულად გამოცხადდნენ და ბორტზე მყოფი ორივე ადამიანი ზღვიდან უვნებლად ამოიყვანეს.

რიზეს გუბერნატორის იჰსან სელიმ ბაიდაშის განცხადებით, ბორტზე მყოფი პირები ბელგიის მოქალაქეები არიან.

"შეტყობინების მიღებისთანავე, რომ სასწავლო თვითმფრინავი რიზე-ართვინის აეროპორტიდან ჩრდილო-დასავლეთით, დაახლოებით 4 მილის დაშორებით, ზღვაში ავარიულად დაეშვა, ჩვენმა სანაპირო დაცვის ჯგუფებმა დაუყოვნებლივ დაიწყეს ოპერაცია.

ავარიულად დაშვებული თვითმფრინავის ბორტზე მყოფი ბელგიის მოქალაქეები ჩვენმა ჯგუფმა უსაფრთხოდ გადაარჩინა. პირველადი შემოწმებით დადგინდა, რომ ორივე მათგანის ჯანმრთელობის მდგომარეობა კარგია. პირველადი ინფორმაციით, თვითმფრინავი საქართველოდან, ბათუმიდან აფრინდა და ძრავის გაუმართაობის გამო საკონტროლო კოშკს დაუკავშირდა, რათა რიზე-ართვინის აეროპორტში დაშვების ნებართვა ეთხოვა, რის შემდეგაც ზღვაში ავარიულად დაეშვა. მომხდარ ინციდენტთან დაკავშირებით, შესაბამისი უწყებების მიერ მიმდინარეობს გამოძიება და მოკვლევა," — განაცხადა გუბერნატორმა.