აზერბაიჯანის პრეზიდენტი ილჰამ ალიევი და მისი ოჯახი ქვეყნის მასშტაბით 15 რეზიდენციას ფლობენ, რომელთა შესახებ ოფიციალური საჯარო ჩანაწერები არ არსებობს. ამის შესახებ დამოუკიდებელი მედიასაშუალების, Meydan TV-ის ჟურნალისტურ გამოძიებაშია ნათქვამი. ინფორმაციას OC media ავრცელებს.

გამოცემის ცნობით, მოსახლეობის სიახლოვეს სახლების დანგრევისა და ხელისუფლების მიერ მიმდებარე საჯარო ტერიტორიებზე წვდომის შეზღუდვის გამო, აღნიშნულმა ქონებამ ადგილობრივებში უკმაყოფილება გამოიწვია.

ალიევების ქონება სტრატეგიულ და ლამაზ ადგილებთან — ტყეებთან, ტბებთან და სანაპიროებთანაა აშენებული. ჟურნალისტურ გამოძიებაში აღნიშნულია, რომ რეზიდენციები აზერბაიჯანის სხვადასხვა რეგიონშია და მხოლოდ ალიევის ოჯახის პირადი სარგებლობისთვისაა განკუთვნილი.

Meydan TV-მ გამოძიება "წლების განმავლობაში სხვადასხვა წყაროდან შეგროვებულ მასალებზე" დაფუძნებით ჩაატარა და აღნიშნა, რომ ქონების ოფიციალურ რეესტრზე წვდომა შეუძლებელი იყო. გამოცემის თქმით, მათ ამ სახლების რუკაზე დატანა ადგილობრივი მაცხოვრებლებისგან მიღებული ინფორმაციისა და სატელიტური ფოტოების მეშვეობით შეძლეს.

მედიასაშუალების ცნობით, ზოგიერთი ამ რეზიდენციის მშენებლობას ადგილობრივი მაცხოვრებლების გამოსახლება და, ზოგ შემთხვევაში, მთელი სოფლების დანგრევა მოჰყვა. გარდა ამისა, მშენებლობაზე დასაქმებულ მუშებს ხელფასების მიღების პრობლემა შეექმნათ.

სოფელი ქუსათი — 2011 წელს აზერბაიჯანის მთავრობამ გაბალის რეგიონში სოფელი ქუსათი დაანგრია. Meydan TV-ის ცნობით, იქვე აშენდა საცხოვრებელი სასახლე ალიევისა და მისი ქალიშვილის, ლეილა ალიევასთვის. გამოცემის ცნობით, 16 ოჯახი იძულებული გახდა დაეტოვებინა საკუთარი სახლები და კომპენსაციის სანაცვლოდ გაბალაში გადასულიყო. მედიას არ დაუკონკრეტებია, რა ოდენობის კომპენსაცია მიიღეს ამ მაცხოვრებლებმა.

"ხუტორის სასახლე" — ცნობების მიხედვით,"ხუტორის სასახლის" აშენების მიზნით, ბაქოს გარეუბანში მდებარე 16-სართულიანი შენობიდან კიდევ 120 ოჯახი გამოასახლეს .

ხოშბულაღი — Meydan TV იუწყება, რომ 2021 წელს დაშქესანის რაიონის სოფელ ხოშბულაღის ადგილობრივებმა საპროტესტო აქცია გამართეს პრეზიდენტის ადმინისტრაციის შენობასთან. მათ განაცხადეს, რომ სასოფლო-სამეურნეო და საძოვარი მიწები ქრთამის სანაცვლოდ გასხვისდა. ქონება, რომელიც, გავრცელებული ინფორმაციით, ალიევის ვაჟისთვის აშენდა, ახლა ხოშბულაღის ერთ-ერთ ყველაზე თვალსაჩინო ადგილას დგას.

კიდევ ერთი ქონება, რომელიც სავარაუდოდ ალიევებს ეკუთვნით, ნოჰურის ტბის მიმდებარედ მდებარეობს. რეზიდენციის აშენების შემდეგ, ტბის ტერიტორიაზე შესვლა ან ფოტოების გადაღება აიკრძალა.

გამოცემამ ყურადღება გაამახვილა კიდევ ერთ უზარმაზარ მდიდრულ კომპლექსზე, რომელიც ბაქოს გარეუბანში, ბილგას სანაპიროზე აშენდა და მილიონობით დოლარი ღირს.

გარდა ამისა, Meydan TV-ის ცნობით, საგანგებო სიტუაციების მინისტრმა, ქამალადინ ჰეიდაროვმა დიდი ქონება ააშენა გაბალის რაიონის სოფელ გამარვანში და იგი ალიევს აჩუქა. ამ კომპლექსს აქვს ჩოგბურთის კორტი, ხელოვნური ტბა და გადაჰყურებს მდინარე ბუმს. ობიექტი მკაცრი დაცვის ქვეშაა.

გავრცელებული ინფორმაციით, ალიევის ოჯახი ქონებას აზერბაიჯანის ფარგლებს გარეთაც ფლობს:

2021 წელს OCCRP-მა (ორგანიზებული დანაშაულისა და კორუფციის გამოძიების პროექტმა) დაადგინა, რომ ლონდონში თითქმის 700 მილიონი დოლარის ღირებულების უძრავი ქონების კოლექცია ალიევის ოჯახმა და მათმა ახლო პარტნიორებმა შეიძინეს.

უცხოური სუბიექტების რეესტრი საჯაროდ აჩვენებს, რომ ალიევის ქალიშვილები, ლეილა და არზუ ალიევები, პირადად ფლობენ ექვს მდიდრულ ბინას ლონდონში, ჰაიდ-პარკის პირდაპირ.

The Guardian-ის ცნობით, ლეილა და არზუ ალიევები ასევე დუბაიში მდებარე მდიდრული კურორტის, Sofitel-ის მფლობელები არიან.