მოკლედ: დღეს, 4 აპრილს, დაჩქარებული წესით განხილულ კანონპროექტს მესამე მოსმენით უყარეს კენჭი და შედეგად, საქართველოს პარლამენტმა გენდერული კვოტები გააუქმა.

  • კვოტების გაუქმებას მხარი 85-მა დეპუტატმა დაუჭირა,
  • წინააღმდეგი იყო — 22.
  • კანონპროექტის განხილვა ორი დღის განმავლობაში ხმაურის და შეურაცხმყოფელი განცხადებების ფონზე მიმდინარეობდა.

მსგავსი: სამადაშვილი მოითხოვს, ოდიშარიამ და მეგრელიშვილმა ნარკოლოგიური შემოწმება გაიარონ

წინაისტორია: 1-ელ აპრილს, პარტია გირჩი გამოვიდა ინიციატივით, რომ გაუქმებულიყო პარლამენტში გენდერული კვოტირება, კონკრეტულად, საარჩევნო კოდექსის 203-ე მუხლი, რომელიც პოლიტიკურ პარტიებს ავალდებულებდა, მათ პროპორციულ სიაში ყოველი მე-4 კანდიდატი განსხვავებული სქესის ყოფილიყო.

  • ცვლილებას თავიდანვე მხარი დაუჭირა მმართველმა პარტიამ, ქართულმა ოცნებამ, რომელიც პარლამენტში საპარლამენტო უმრავლესობას ფლობს.

"პოლიტიკური ვაჭრობის" კონტექსტი: 1-ელ აპრილს, ოცნების დეპუტატმა ბექა დავითულიანმა განაცხადა, რომ კვოტების გაუქმების სანაცვლოდ, ქართულმა ოცნებამ გირჩისგან მიიღო დაპირება, რომ ცესკოს თავმჯდომარის არჩევის პროცესში, გირჩი ორიენტირებული იქნება კანდიდატის "პროფესიონალიზმსა და კეთილსინდისიერებაზე".

  • 2 აპრილს კი, გირჩის წევრმა ალექსანდრე რაქვიაშვილმა თქვა, რომ გირჩსა და ოცნებას შორის შეთანხმება "პოლიტიკური ვაჭრობის" კარგი მაგალითია.

პოზიციები: გენდერული კვოტების გაუქმებასთან დაკავშირებით, ოპოზიციონერმა დეპუტატმა თეონა აქუბარდიამ On.ge-სთან თქვა, რომ გენდერული კვოტების გაუქმება, 2024 წლის საპარლამენტო არჩევნებისთვის "ფულიანი მაჟორიტარების კარგ პოზიციაზე დაბინავებას ემსახურება".

  • იმავე პოზიციაზე იყო ბაია პატარაია, ორგანიზაცია საფარის აღმასრულებელ დირექტორი, რომელმაც გვითხრა, რომ ოცნების მიზანია, საარჩევნო სიებში მილიონერი მაჟორიტარი კაცები შეიყვანოს, რაშიც, გენდერული კვოტირება და სიაში ყოველი მეოთხე ქალის ჩასმის ვალდებულება, აქამდე ხელს უშლიდა.

რედაქციისგან: რატომ გვჭირდება გენდერული კვოტირების პოლიტიკა — პოზიციები და ანალიზი

გარდა ამისა, 80-მა არასამთავრობო ორგანიზაციამ განაცხადა, რომ გენდერული კვოტის გაუქმება ეწინააღმდეგება საქართველოს კონსტიტუციაში ასახულ ხალხის ნებას, არღვევს ქალთა უფლებებს და აფერხებს ევროინტეგრაციის პროცესს.