ამერიკის შეერთებული შტატების პრეზიდენტი, დონალდ ტრამპი გერმანიაში, საქსონია-ანჰალტის მხარეში ჩატარებული რეგიონული საპარლამენტო არჩევნების შედეგებს Truth Social-ზე გამოეხმაურა. მისი თქმით, გერმანია აღმავლობის გზაზეა.

"ვაუ! გერმანიის პოპულისტურ პარტიას მართლაც დიდი საღამო ჰქონდა. მათ საბოლოოდ ყელში ამოუვიდათ საშინელი საიმიგრაციო წესები და რეგულაციები, რამაც გერმანია ასე ძლიერ დააზარალა. ისინი აღმავლობის გზაზე არიან და ამას მეტს აღარ მოითმენენ! MGGA!!! (გახადე გერმანია კვლავ დიადი)", — დაწერა დონალდ ტრამპმა.

ცნობისთვის, გერმანიის საქსონია-ანჰალტის მიწის პარლამენტის არჩევნების წინასწარმა შედეგებმა ულტრამემარჯვენე პარტია ალტერნატივა გერმანიისთვის (AfD)-ის გამარჯვება დაადასტურა, თუმცა პარტიამ აბსოლუტური უმრავლესობა ვერ მოიპოვა.

Spiegel-ის მონაცემებით, წინასწარი შედეგებით, საქსონია-ანჰალტის არჩევნებში AfD-მ 43.8% მიიღო. 2021 წელთან შედარებით პარტიამ შედეგი თითქმის გააორმაგა, თუმცა ეს საკმარისი არ აღმოჩნდა აბსოლუტური უმრავლესობის მოსაპოვებლად. საღამოს პროგნოზით, AfD-ს 44.5%-ს უწინასწარმეტყველებდნენ.