მოკლედ: ჯანდაცვის მინისტრის, მიხეილ სარჯველაძის ინფორმაციით, ონკოპაციენტების დაფინანსებისთვის განსაზღვრული წლიური 25 000-ლარიანი ლიმიტიდან, მედიკამენტების ხარჯები ცალკე გამოიყოფა და მათ სახელმწიფო პროგრამა დააფინანსებს.

  • ეს ცვლილება შეეხებათ იმ პაციენტებსაც, რომელთაც, შესაძლოა, 25 000-ლარიანი ლიმიტი ამოწურული აქვთ.

დეტალები: მინისტრი აცხადებს, რომ ერთ-ერთი პირველი დავალება, რაც თანამდებობაზე დანიშვნის შემდეგ, საქართველოს პრემიერ-მინისტრ ირაკლი კობახიძისგან მიიღო, ონკოლოგიური დიაგნოზის პაციენტების პრობლემებზე მუშაობა იყო:

  • "ცვლილებიდან გამომდინარე, პრაქტიკულად გამოირიცხება იმის შესაძლებლობა, რომ რომელიმე პაციენტისთვის ლიმიტის გამო ხელმიუწვდომელი გახდეს სახელმწიფოს მიერ დაფინანსებული მკურნალობის სრული კურსი".
  • სარჯველაძის თქმით, პარალელურად, ჯანდაცვის სამინისტრო მუშაობას გააგრძელებს იმაზე, რომ პაციენტების ინტერესებთან არათავსებადი გადახარჯვების შემთხვევები არ მოხდეს.

ფართო სურათში: ონკოპაციენტები 2024 წლის თებერვლიდან აქტიურად აპროტესტებენ 25 000-ლარიან ლიმიტს. მათ რამდენიმე აქცია გამართეს, როგორც ჯანდაცვის სამინისტროსთან, ასევე საქართველოს პარლამენტთან და მთავრობის კანცელარიასთან.

  • ორშაბათს, 8 აპრილს, კავშირი სიცოცხლისთვის, მთავრობის კანცელარიასთან კიდევ ერთ აქციას გამართავს.
  • აქციის ორგანიზატორები წერენ, რომ სახელმწიფოს მხრიდან გულგრილობა მათ იძულებულს ხდის, 8 აპრილიდან, 24-საათიან პროტესტზე გადავიდნენ:
  • "მოთხოვნები უცვლელია: ვითხოვთ ლიმიტის გაუქმებას და პერსონალიზებულ მედიცინას. ეს გულისხმობს როგორც გეგმური და წინასწარი კვლევების, ასევე, ყველა სიცოცხლისთვის აუცილებლად საჭირო მედიკამენტის ფიზიკურ და ფინანსურ ხელმისაწვდომობას".
  • გარდა ამისა, ონკოპაციენტები მიხეილ სარჯველაძის პირველი მოადგილის, თამარ გაბუნიას გადაყენებას ითხოვენ, რადგან, მათი თქმით, 12 მარტის შეხვედრაზე, გაბუნიამ განაცხადა, რომ მედიკამენტების დეფიციტი მოხსნილია, "რაც აღმოჩნდა, რომ არ შეესაბამება სიმართლეს და დღესაც, ქვეყანაში ისევ დეფიციტია".