რა ხდება: ჯანდაცვის მინისტრად მიხეილ სარჯველაძე დაინიშნა.

  • ამის შესახებ ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

დეტალები: მიხეილ სარჯველაძე განათლებით სამართალმცოდნეა.

  • კობახიძემ თქვა, რომ გასული კვირის განმავლობაში მართავდა კონსულტაციებს, თუ ვინ შეიძლებოდა ყოფილიყო ჯანდაცვის ახალი მინისტრი.
  • "კონსულტაციების ერთ-ერთი მთავარი საკითხი იყო ის, თუ რამდენად უნდა ყოფილიყო ახალი მინისტრი სამედიცინო წრეების წარმომადგენელი. ამ საკითხთან დაკავშირებით როგორც პოლიტიკურ გუნდში, ისე სამედიცინო საზოგადოების წარმომადგენლებს შორის აზრი იყო ორად გაყოფილი. ერთი ნაწილი მიიჩნევდა, რომ ახალი მინისტრი აუცილებლად სამედიცინო სფეროს წარმომადგენელი უნდა ყოფილიყო. მეორე ნაწილი ზუსტად ამის საპირისპირო მოსაზრებას გამოხატავდა", — თქვა კობახიძემ.
  • როგორც მან აღნიშნა, კონსულტაციების საფუძველზე მივიდა დასკვნამდე, რომ შეიძლებოდა ამ თანამდებობაზე არასამედიცინო განათლების მქონე კანდიდატის განხილვაც.
  • "საბოლოოდ, უპირატესობა მივანიჭე ჩვენი პოლიტიკური გუნდის წევრს, რომლის პროფესიონალიზმისა და კეთილსინდისიერების, გამოცდილების მიმართ განსაკუთრებული ნდობა მაქვს", — თქვა პრემიერ-მინისტრმა.

კობახიძემ საზოგადოებას სარჯველაძის ბიოგრაფიაც შეახსენა:

  • 2012 წლამდე ის ეწეოდა საადვოკატო საქმიანობას
  • 2012 წლის შემდეგ საჯარო სამსახურში სხვადასხვა თანამდებობა ეკავა — სარჯველაძე იყო აღსრულების ეროვნული ბიუროს ხელმძღვანელი, მოგვიანებით — იუსტიციის მინისტრის მოადგილე, საპარლამენტო გუნდის წევრი და პარლამენტის ადამიანის უფლებათა დაცვის უფლებათა და სამოქალაქო ინტეგრაციის კომიტეტის თავმჯდომარე.
  • "გამოწვევა არის უამრავი. ყველა მიმართულებით არის სერიოზული გამოწვევა, თუმცა, დარწმუნებული ვარ, მისი პროფესიონალიზმი და გამორჩეული პიროვნული თვისებებით იქნება საუკეთესო მინისტრი და მნიშვნელოვან წარმატებას მოუტანს ამ დარგს“, — განაცხადა კობახიძემ.

ბოლო ხაზი: ჯანდაცვის მინისტრის სავარძელი 1 მარტის შემდეგ ვაკანტური იყო.

  • ზურაბ აზარაშვილმა თანამდებობა პრემიერ-მინისტრთან საუბრის შემდეგ დატოვა.