მოკლედ: ონკოპაციენტები სახელმწიფოსგან მეტ ყურადღებას მოითხოვენ.

  • საკუთარი მოთხოვნების შესახებ დღეს პარლამენტის შენობასთან გამართულ აქციაზე კიდევ ერთხელ ისაუბრეს.
  • ორგანიზატორი იყო ორგანიზაცია კავშირი სიცოცხლისთვის.

დეტალები: აქციაზე, სახელწოდებით მინდა ვიცოცხლო, ონკოპაციენტებმა მოითხოვეს:

  • სახელმწიფომ შეუფერხებლად დააფინანსოს ონკოპაციენტების მკურნალობა და მოხსნას 25 000-ლარიანი ლიმიტი.
  • დროულად შემოიტანონ მედიკამენტები და პაციენტებს "არ უწევდეთ წამლის საძებნელად აფთიაქიდან აფთიაქში სიარული".
  • ასევე, გაიზარდოს იმ მედიკამენტების რაოდენობა, რომლებიც სახელმწიფო ბიუჯეტიდან ფინანსდება — მათი თქმით, ზოგი სასიცოცხლოდ მნიშვნელოვანი წამალი საქართველოში ჯერ რეგისტრირებულიც კი არ არის.

"შარშან ყველანი სიხარულით შევხვდით მთავრობის ინიციატივას კიბოს უფასოდ მკურნალობის შესახებ. ჩვენ დაგვპირდნენ “უწყვეტ და უფასო მკურნალობას“, სინამდვილეში კი სიმსივნის დიაგნოზის მქონე ადამიანებს საქართველოში მუდმივად უგვიანდებათ დაფინანსება, ეძებენ გადარჩენის გზებს და ხშირად ვერ შოულობენ წამლებს", — ნათქვამია აქციის ორგანიზატორების განცხადებაში.