მოკლედ: გარემოს ეროვნული სააგენტოს მიხედვით, გეოლოგების ჯგუფებმა სტიქიის ზონებში შეაფასეს 189 ოჯახი, გატარდა საპრევენციო ზომები და მდგრად ადგილზე გადაყვანას დაექვემდებარა 94 ოჯახი.

  • გეოლოგების 4 ჯგუფი არის აჭარაში, 3 იმერეთში და 1 შიდა ქართლის ტერიტორიაზე.

დეტალები: სააგენტოს მიხედვით, ამ დროისათვის შიდა ქართლში, სოფელ ტაშისკარშის მიმდებარე ტერიტორიაზე, სადაც მეწყრული და ღვარცოფული პროცესები განვითარდა, მიმდინარეობს გაწმენდითი სამუშაოები

  • "ბოლო დღეებში ქვეყნის მასშტაბით ინტენსიურად მიმდინარე თოვლის დნობის პროცესს თან დაერთო უხვი ატმოსფერული ნალექების მოსვლა წვიმის სახით, რამაც გამოიწვია ბუნებრივად ისედაც დაძაბულ ტერიტორიებზე სხვადასხვა სტიქიური პროცესების (მეწყერი, ღვარცოფი, წყალდიდობა, წყალმოვარდნა, თოვლის ზვავი) ჩასახვა-გააქტიურება", — წერს გარემოს ეროვნული სააგენტო.

რა მოხდა: 6 თებერვალს, აჭარაში, ზვავის ჩამოწოლის შედეგად ორი ადამიანი დაიღუპა.

  • 6 თებერვალს დასავლეთ საქართველოში ძლიერმა ქარმა და წყალდიდობამ დააზიანა ინფრასტრუქტურა, დაიტბორა 6 ოჯახი.
  • 7 თებერვალს, სოფელ ნერგეეთში, მეწყერი ჩამოწვა, რასაც 9 ადამიანი ემსხვერპლა. დიდი მიწის მასამ 4 საცხოვრებელი სახლი მოიყოლა.
  • 8 თებერვალს სურამში მეწყრული პროცესები განვითარდა, 40 ოჯახი საშიში ზონიდან გაიყვანეს.

ნერგეეთში, სადაც სტიქიას 4 ადამიანი ემსხვერპლა, მეწყრულ პროცესებს 2022 წლიდან პროგნოზირებდნენ:

გარემოს ეროვნული სააგენტოს გეოლოგიის დეპარტამენტის ბიულეტენში, რომელიც 2023 წელს პროგნოზირებს, წერია, რომ:

  • მეწყრული პროცესების გააქტიურება მოსალოდნელია სოფლებში: ობჩა, დიმი, წილეთხევი, ფერსათი, ნერგეეთი, შუბანი და ზეგანი.

  • ნერგეეთში მეწყერი მდინარე ხანისწყლის ნაპირზე მდებარე სახლების თავზე ჩამოწვა. დოკუმენტის მიხედვით, სწორედ ამ ადგილას იყო მოსალოდნელი ქვათაცვენის და ნაპირგარეცხვითი პროცესების წარმოქმნა-გააქტიურება.

გაიგე მეტი: ნერგეეთში, სადაც სტიქიას 9 ადამიანი ემსხვერპლა, მეწყრულ პროცესებს 2022 წლიდან პროგნოზირებდნენ.