რა მოხდა: დღეს, 6 თებერვალს, აჭარაში, ზვავის ჩამოწოლის შედეგად ორი ადამიანი დაიღუპა.

დეტალები: ხულოს მუნიციპალიტეტის სტიქიით დაზარალებულთა სამსახურის უფროსმა ჯამბულატ მელაძემ On.ge-ს უთხრა, რომ სოფელ თხილვანში, ზვავში სახლი მოჰყვა, რომელშიც ცოლ-ქმარი იმყოფებოდა. ქმრის გადარჩენა მეზობლებმა შეძლეს, ცოლი კი დაიღუპა.

  • "ადგილზე მუშაობს ტექნიკა, ბატონი მერი და საკრებულოს თავმჯდომარე ადგილზე იმყოფებიან", — გვითხრა ჯამბულატ მელაძემ.
  • ზვავმა საცხოვრებელ სახლთან ერთად, მისი "დამხმარე" ნაგებობაც წაიღო.

ასევე, შინაგან საქმეთა სამინისტროს ინფორმაციით, სოფელ წონიარისში, მეწყრის ჩამოწოლის შედეგად, გარდაიცვალა თემურ ბარამიძე, შსს-ს აჭარის პოლიციის დეპარტამენტის ქედის რაიონული სამმართველოს უბნის უმცროსი ინსპექტორი.

  • შსს მიხედვით, ზვავის ჩამოწოლის დროს ის საკუთარ სახლში იმყოფებოდა.

ბოლო ხაზი: დღეს, 6 თებერვალს თოვლის, ქარბუქისა და სხვა რთული მეტეოროლოგიური პირობების გამო, რამდენიმე სატრანსპორტო მონაკვეთზე შეზღუდვები დაწესდა.

  • გარდა ამისა, დასავლეთ საქართველოში ძლიერმა ქარმა და წყალდიდობამ დააზიანა ინფრასტრუქტურა, დაიტბორა 6 ოჯახი.

მგავსი: მოგლეჯილი ხეები, წყალდიდობა, დაზიანებული სახურავები — რა მდგომარეობაა სამეგრელო-ზემო სვანეთში