მოკლედ: ათი არასამთავრობო ორგანიზაცია, რომლებიც საქართველოს ეროვნული პლატფორმის წევრები არ არიან, საქართველოს პარლამენტს მოუწოდებს, ევროკომისიის 9 დათქმასთან დაკავშირებულ სამუშაო პროცესში ჩართონ.

  • ხელმომწერი ორგანიზაციები არიან: საქართველოს ახალგაზრდა იურისტთა ასოციაცია (GYLA), საფარი, სოციალური სამართლიანობის ცენტრი (SJC), დემოკრატიის კვლევის ინსტიტუტი (DRI), ევროპულ-ქართული ინსტიტუტი (EGI), ინფორმაციის თავისუფლების განვითარების ინსტიტუტი (IDFI), ღია სივრცე კავკასია, უფლებები საქართველო, სამართლიანი არჩევნებისა და დემოკრატიის საერთაშორისო საზოგადოება (ISFED), ადამიანის უფლებათა ცენტრი.

სტრიქონებს შორის: 2022 წლის აგვისტოში ქართულმა ოცნებამ საარჩევნო კოდექსის გადასინჯვის საკითხზე შექმნილ სამუშაო ჯგუფში ორგანიზაცია ISFED (სამართლიანი არჩევნებისა და დემოკრატიის საერთაშორისო საზოგადოება) არ მიიწვია, რის შედეგადაც, არასამთავრობოების გაერთიანება პლატფორმა რამდენიმე ორგანიზაციამ დატოვა. ეს ორგანიზაციებია: საერთაშორისო გამჭვირვალობა - საქართველო (TI), ინფორმაციის თავისუფლების განვითარების ინსტიტუტი (IDFI), დემოკრატიის კვლევის ინსტიტუტი (DRI), საქართველოს ახალგაზრდა იურისტთა ასოციაცია (საია) და სოციალური სამართლიანობის ცენტრი (SJC).

რა არის საქართველოს ეროვნული პლატფორმა: არასამთავრობო ორგანიზაციების გაერთიანება, რომელიც აღმოსავლეთ პარტნიორობის სამოქალაქო საზოგადოების ინიციატივის ფარგლებში შეიქმნა და მონაწილეობს კანდიდატი ქვეყნის სტატუსის მინიჭებისთვის ევროკომისიის მიერ გაცემული 12 პრიორიტეტის შესრულებისთვის შექმნილ საპარლამენტო ჯგუფებში.

განცხადების დეტალები: ხელმომწერი ორგანიზაციები აცხადებენ, რომ პარლამენტის თავმჯდომარეს წერილობით მიმართეს მას შემდეგ, რაც ცნობილი გახდა, რომ საქართველოს პარლამენტში იგეგმებოდა სამუშაო შეხვედრა ევროკომისიის 9 დათქმის შესრულებასთან დაკავშირებით.

  • "პარლამენტს მოვუწოდეთ, გაეფართოებინა სამოქალაქო სექტორთან თანამშრომლობის ფორმატი და უზრუნველეყო ფართო სამუშაო ფორმატის გამართვა და მასში დაინტერესებული ორგანიზაციების ჩართვა", — წერია განცხადებაში.
  • ორგანიზაციების თქმით, მათი მიმართვა პარლამენტმა არ დააკმაყოფილა და შეხვედრაზე არ მიიწვია. მათ შეხვედრაზე მიწვევაზე.

რატომ არის მნიშვნელოვანი სამუშაო შეხვედრაში არასამთავრობოების ჩართულობა: იმიტომ, რომ ევროკომისიისგან მიღებულ 9 პირობაში აღნიშნულია, რომ პირობების შესრულების პროცესი უნდა იყოს ინკლუზიური: "ვენეციის კომისიის რეკომენდაციების შესაბამისად, მნიშვნელოვანია გამჭვირვალე და ინკლუზიური პროცესის წარმართვა ოპოზიციური პარტიებისა და სამოქალაქო საზოგადოების ჩართულობით", — ვკითხულობთ დათქმებში.

მსგავსი: რა ხდებოდა დღეს პარლამენტში სამუშაო შეხვედრისას, 9 რეკომენდაციასთან დაკავშირებით — მხარეთა კომენტარები