მოკლედ: 14-15 დეკემბერს, საქართველო ბრიუსელიდან ევროსაბჭოს ლიდერების პასუხს ელოდება, კანდიდატი ქვეყნის სტატუსთან დაკავშირებით.

დეტალები: დღეს ბრიუსელში ევროკავშირის 2-დღიანი სამიტი დაიწყო, რომელშიც ევროკავშირის 27 წევრი ქვეყნის პირველი პირი მონაწილეობს.

• სამიტის განსახილველ თემებს შორის არის ევროკავშირის გაფართოების პოლიტიკა, რაც საქართველოსთვის კანდიდატი ქვეყნის სტატუსის მინიჭების საკითხთან ერთად, ასევე მოიცავს უკრაინასთან და მოლდოვასთან გაწევრიანების მოლაპარაკებების საკითხს.
• განხილვის ზუსტი დრო ისევ უცნობია, მაგრამ საქართველოსთან დაკავშირებით ევროპის პოლიტიკური ლიდერები პოზიტიურ გზავნილებს ავრცელებენ.
• შესაძლოა, უკრაინასთან დაკავშირებული საკითხის განხილვა შეაყოვნოს უნგრეთის პრემიერ-მინისტრის, ვიქტორ ორბანის პოზიციებმა.

რას ამბობენ საქართველოზე?

• რობერტა მეცოლა, ევროპარლამენტის პრეზიდენტი: "ევროპული პარლამენტის სახელით მინდა გითხრათ, რომ ჩვენ ვართ ძალიან ახლოს საქართველოსთან, რა თქმა უნდა, გვაქვს კითხვები, მაგრამ თუ იქნება შემდეგი ნაბიჯის გადადგმის შესაძლებლობა, როგორც კი პირობები შესრულდება, ჩვენ ვიმუშავებთ ამაზე", — უთხრა მან საინფორმაციო სააგენტო ინტერპრესნიუსს.
  
• ვიქტორ ორბანი, უნგრეთის პრემიერ-მინისტრი: "საქართველოს საქმე კარგადაა, მზადაა, თქვენ ყველას უყვარხართ", — თქვა მან ქართველი ჟურნალისტების შეკითხვის პასუხად.
• გიტანას ნაუსედა, ლიეტუვის პრეზიდენტი: "ვიმედოვნებ, ხელიდან არ იქნება გაშვებული შესაძლებლობა, მიიწვიონ უკრაინა და მოლდოვა ევროკავშირში გაწევრიანებაზე მოლაპარაკებების დასაწყებად, საქართველო კი კანდიდატის სტატუსის მისანიჭებლად."
• კაია კალასი, ესტონეთის პრემიერ-მინისტრი: "ყველა ქვეყნის საკითხს განვიხილავთ, განცალკევებულად და ერთადაც. საქართველოს საკითხიც მათ შორის არის, მაგრამ უფრო დიდი პრობლემა შეეხება უკრაინასა და მოლდოვას. ვნახოთ, რა გამოვა."
• ჯოზეფ ბორელი, ევროკავშირის უმაღლესი წარმომადგენელი: "საქართველო კარგად მუშაობს, საქართველომ წარმატებას მიაღწია. საქართველომ უნდა გააგრძელოს მუშაობა სწორი მიმართულებით."
• პეტერი ორპო, ფინეთის პრემიერ-მინისტრი: "ფინეთი მხარს უჭერს საქართველოსთვის კანდიდატის სტატუსის მინიჭებას."

კონტექსტი: 13 დეკემბერს, ევროპარლამენტმა მხარი დაუჭირა რეზოლუციას გაფართოების პოლიტიკის შესახებ, რომლითაც ევროსაბჭოს მოუწოდებენ, მხარი დაუჭირონ საქართველოსთვის კანდიდატის სტატუსის მინიჭებას 14-15 დეკემბერს.

პროცედურულად, სწორედ ევროპარლამენტის თანხმობა უსწრებს წინ ევროკავშირის ყველა წევრი სახელმწიფოს პოლიტიკური ლიდერის გადაწყვეტილებას, დაამტკიცოს კანდიდატი ქვეყნისთვის გაწევრიანების ხელშეკრულება, რომლის საფუძველზეც, სამომავლოდ, ქვეყანა ევროკავშირის წევრი გახდება.

ბოლო ხაზი: ევროპელი ლიდერების დადებითი პასუხის შემთხვევაში, ეს იქნება ბოლო ნაბიჯი, რომელსაც საქართველო კანდიდატის ქვეყნის სტატუსის მოსაპოვებლად გაივლის და ამას უკვე ახალი პროცედურები მოჰყვება.