მოკლედ: საქართველოს მარნების წარმომადგენლები ევროკავშირის ელჩს, პაველ ჰერჩინსკის მიმართავენ, მიიღოს ევროკავშირმა საქართველოსთვის მნიშვნელოვანი გადაწყვეტილება, ევროკავშირის კანდიდატი ქვეყნის სტატუსის მინიჭებასთან დაკავშირებით.

  • მიმართვას, ათობით კომპანიის წარმომადგენელთა 178 ხელმომწერი ჰყავს.

რატომ არის მნიშვნელოვანი: საქართველოს მარნების წარმომადგენლები, ჰერჩინსკის მიმართავენ, რომ ათწლეულების მანძილზე, საბჭოთა და პოსტსაბჭოთა საქართველოს მევენახეობა-მეღვინეობა დამოკიდებული იყო რუსეთის დიდ, არასტაბილურ და დაბალი სამომხმარებლო კულტურის ბაზარზე.

  • ამის გავლენით, ქართული ღვინო ყალიბდებოდა დაბალი ხარისხის, იაფფასიან პროდუქტად;
  • 2006 წლის შემდეგ, როდესაც რუსეთმა ემბარგო დააწესა ქართულ ღვინოზე, სახელმწიფომ დაიწყო ზრუნვა წარმოების ხარისხის გაუმჯობესებასა და ქართული ღვინის, როგორც ბრენდის რეფორმაზე.
  • "ამ საქმეში კი ჩვენ გვერდით იდგნენ ღვინის ევროპელი პროფესიონალები, გავლენიანი მედია, ევროპული ორგანიზაციები და ფონდები", — ამბობენ განცხადების ავტორები. "მიკრო და მცირე მეწარმეებს, ვისაც მანამდე შეზღუდული ჰქონდა ფინანსებზე წვდომა, ევროპული ფონდების დახმარებით მიეცათ შესაძლებლობა, მამა-პაპათა საქმიანობისთვის ეკონომიკური ღირებულება მიენიჭებინათ."

ბოლო ხაზი: "როგორც საქართველოს უახლეს ისტორიაში ქართულმა ღვინომ გაიკვალა გზა თავის ბუნებრივ ეკოსისტემაში — ევროპაში, სწორედ ასე დაიმკვიდროს დამოუკიდებელმა საქართველომ, როგორც სახელმწიფომ, თავისი ადგილი თავისუფალი სამყაროს ევროპულ ოჯახში", — აცხადებენ ისინი.