ძალაში შევიდა "საერთო სასამართლოების შესახებ" კანონში "ქართული ოცნების" მიერ მიღებული ცვლილებები, რომლებიც სასამართლოებზე მედიის მუშაობის მნიშვნელოვან შეზღუდვას ითვალისწინებს.

სასამართლოს ტერიტორიაზე: შენობაში, სხდომათა დარბაზსა და ეზოში აიკრძალა ფოტო, კინო, ვიდეო და აუდიო გადაღება, იმ შემთხვევის გარდა, როდესაც ამას სასამართლო ან სასამართლოს მიერ უფლებამოსილი პირი ახორციელებს. საქართველოს იურისტთა ასოციაციის ცნობით, გადაღებულ მასალაზე კონტროლი მთლიანად სასამართლოს განკარგულების ქვეშ მოექცევა.

მასალების გადასაღებად იუსტიციის უმაღლესი საბჭოსგან ნებართვაა საჭირო.

საია-ს განცხადებით, კანონის ძალაში შესვლიდან პირველივე დღეს ნათელი გახდა მისი პრობლემა. საჯარო ინტერესიდან გამომდინარე მედიებმა მოითხოვეს აღნიშნული ნებართვა, თუმცა უკუკავშირი იუსტიციის უმაღლესი საბჭოდან არ მიუღიათ.

"კანონის ამ ნაწილის ამოქმედებიდან პირველივე დღეს გამოვლინდა მისი აღსრულების პრობლემა, რომელმაც მედიასაშუალებების ფუნქციონირება შეუძლებელი გახადა. არაერთმა მედიასაშუალებამ მიმართა იუსტიციის უმაღლეს საბჭოს კონკრეტულ — თერთმეტპირიანი საქმის (აქციების კონტექსტში დაკავებული: ანდრო ჭიჭინაძის, ონისე ცხადაძის, გურამ მირცხულავას, ჯანო არჩაიას, ლუკა ჯაბუას, რუსლან სივაკოვის, რევაზ კიკნაძის, გიორგი ტერაშვილის, ვალერი თეთრაშვილის, სერგეი კუხარჩუკის და ირაკლი ქერაშვილის) სასამართლო სხდომაზე ვიდეო და აუდიო ჩაწერის თაობაზე, თუმცა სხდომის დაწყებამდე მათ მიმართ უკუკავშირი საბჭოდან არ ყოფილა," — აღნიშულია განცხადებაში.

სხდომის განმხილველ მოსამართლე ნინო გალუსტაშვილს ადვოკატებმა სთხოვეს დაჰკავშირებოდა უმაღლესი საბჭოს წარმომადგენლებს, მედიების დაშვების საკითხთან დაკავშირებით, თუმცა დაცვის მხარის ეს თხოვნა მოსამართლემ არ გაითვალისწინა.

"აღნიშნული ბიუროკრატიული მექანიზმი პრაქტიკულად სრულად უზღუდავს მედიას პროცესების გაშუქებას. საგულისხმოა, რომ ზოგიერთი სასამართლო ეტაპის სასამართლო სხდომები — ე.წ. პირველი წარდგენის სხდომები მცირე საპროცესო ვადების გამო, ხშირად მხოლოდ რამდენიმე საათით ადრე ინიშნება. ასეთ ვითარებაში, მედიებს პრაქტიკულად არც კი დარჩებათ დრო, რომ მიიღონ დროულად პასუხი იუსტიციის უმაღლესი საბჭოდან.

ნათელია, რომ აღნიშნული ცვლილებები პირდაპირ განზრახვით მიმართული იყო მაღალი საზოგადოებრივი ინტერესის მქონე საქმეების გაშუქების შეზღუდვისკენ."

იურისტთა ასოციაცია მიიჩნევს, რომ მედიის შემზღუდველი კანონი "სამართლიანი სასამართლოს ერთ-ერთი სტრუქტურული პრინციპის, საჯაროობისა და გამჭვირვალობის, საწინააღმდეგო გამოვლინებაა."

ასევე იხილეთ:

"ოცნების" პარლამენტმა "საერთო სასამართლოების შესახებ" კანონში ცვლილებები მესამე მოსმენით დაამტკიცა