იურისტი გურო იმნაძე საერთო სასამართლოების შესახებ კანონში მიღებულ ცვლილებებს ეხმაურება, რომლის მიხედვითაც მედიას სასამართლოში ფოტო და ვიდეოგადაღება აეკრძალა. მისი თქმით, ეს ცვლილება უსამართლოა და ამგვარი ნაბიჯი ვერ ჩაითვლება "საქართველოს სახელით" მიღებულ გადაწყვეტილებად.

იურისტი წერს, რომ "სასამართლო დარბაზების დახურვა მოკლევადიან პერსპექტივაში კი აადვილებს უსამართლო მართლმსაჯულების ადმინისტრირებას, მაგრამ გრძელვადიან პერსპექტივაში ის ამ უსამართლობისთვის ნასროლი კიდევ ერთი აგურია".

"სასამართლოს შენობაში ვიდეოგადაღების აკრძალვაზე:

დავიწყოთ იმით, რომ სასამართლოს გადაწყვეტილება მიიღება "საქართველოს სახელით". ამ სიმბოლურ დასათაურებაში ის შინაარსიც იკითხება, რომ მართლმსაჯულება ყველასია (უფრო სწორად, ყველასი უნდა იყოს), ხოლო მოსამართლის მიერ მიღებულ გადაწყვეტილებას, მის შინაარს, ნდობას უცხადებს ფართო საზოგადოება.

სხვა შემთხვევაში, "საქართველოს სახელით" მიღებული გადაწყვეტილება ჯერ ბუტაფორიულ მნიშვნელობას იძენს, მერე კი აქეთ ხდება თვითნებობის სიმბოლო, რადგან არ შეიძლება, საზოგადოების სახელით მოქმედებაზე ვინმეს ჰქონდეს პრეტენზია, თუ მას მინიმალური საზოგადოებრივი ნდობაც კი არ გააჩნია.

იმის გათვალისწინებით, რომ ქართულ სასამართლოს უბრალოდ არ აქვს დამოუკიდებლობის და მაღალი საზოგადოებრივი ნდობის ისტორია, ღიაობა და ანგარიშვალდებულება ერთადერთი თუ არა, ერთ-ერთი უმთავრესი იარაღი უნდა იყოს არსებული უნდობლობის გასაფანტავად. ამიტომ არ გამოდგება სხვა ქვეყნების გამოცდილებაზე მითითება, რომ თურმე რომელიმე დემოკრატიულ სახელმწიფოშიც არსებობს ვიდეო-გადაღებაზე შეზღუდვები. იმ რომელიღაცა დემოკრატიულ ქვეყანაში არ არსებობს სასამართლოს ტოტალური მორჩილების გამოცდილება, იქ უდიპლომო, ლოიალისტი ადამიანები არ ინიშნებიან მოსამართლეებად და იქ მთელი სასამართლო კორპუსი იმით არ ამაყობს, რომ კოლექტიური მურუსიძეა.

დახურული კონკურსის შედეგად თანამდებობაზე დანიშნული მოსამართლეების მიერ, დახურულ დარბაზებში მიღებული გადაწყვეტილებები, რომლებიც ასევე დახურულია და მათი წაკითხვის უფლება არ გვაქვს, ვერანაირად ვერ ჩაითვლება "საქართველოს სახელით" მიღებულ გადაწყვეტილებად. ასეთ გადაწყვეტილებას შეუძლებელია ამბიცია ჰქონდეს, რომ ის სავალდებულოდ შესასრულებელია.

ასე რომ, სასამართლო დარბაზების დახურვა მოკლევადიან პერსპექტივაში კი აადვილებს უსამართლო მართლმსაჯულების ადმინისტრირებას, მაგრამ გრძელვადიან პერსპექტივაში ის ამ უსამართლობისთვის ნასროლი კიდევ ერთი აგურია, რადგან ყველამ ვიცით, ამ გადაწყვეტილების მიზანი რაც არის.

P.S. უდიდესი მადლობა ყველა იმ ჟურნალისტს და სამოქალაქო აქტივისტს, ვინც დღემდე დიდი ნერვების და ჯაფის ფასად აშუქებდა სასამართლოებში მიმდინარე საქმეებს. მჯერა, რომ ამ შეზღუდვების მიუხედავად, კიდევ მოიძებნება ფორმები, რომლითაც საზოგადოებას მოვუყვებით სასამართლო დარბაზებში მიმდინარე ამბებზე. დღეს ამაზე მნიშვნელოვანი და საჭირო საქმე ძალიან ცოტაა," — წერს გურო იმნაძე საკუთარ სოციალურ ქსელში.