ოცნების პარლამენტის საპროცედურო საკითხთა კომიტეტი ოცნების პარლამენტს პარტია გახარია საქართველოსთვის 12-ვე დეპუტატისთვის უფლებამოსილების ვადამდე ადრე შეწყვეტის რეკომენდაციით მიმართავს. ამის შესახებ ინფორმაციას IPN ავრცელებს.

კომიტეტმა დღეს გამართულ სხდომაზე წარადგინა დასკვნა, რომლის მიხედვით, საგაზაფხულო სესიის განმავლობაში 26 პლენარული სხდომა გაიმართა. აქედან, გახარია საქართველოსთვის წევრებმა 26 სხდომიდან ყველა არასაპატიო მიზეზით გააცდინეს.

დეპუტატები, რომელთაც უფლებამოსილება პარლამენტის სხდომების არასაპატიო მიზეზით გაცდენის გამო შეუწყდებათ არიან: გიორგი გახარია, თეონა აქუბარდია, ანა ბუჩუკური, ლევან გოგიჩაიშვილი, ზაზა თავაძე, ბექა ლილუაშვილი, ნათია მეზვრიშვილი, ბერდია სიჭინავა, კახა ქემოკლიძე, როინ ქოჩორაშვილი, დიმიტრი ცქიტიშვილი და ზვიად ძიძიგური.

მათთვის სადეპუტატო უფლებამოსილების ვადამდე ადრე შეწყვეტის საკითხზე გადაწყვეტილებას პარლამენტი 1 ან 2 ივლისის რიგგარეშე სხდომაზე მიიღებს.

ცნობისთვის, ჯერ კიდევ ნოემბერში გახარია საქართველოსთვის ერთ-ერთმა ლიდერმა, ბექა ლილუაშვილმა ჟურნალისტებთან საუბრისას აღნიშნა, რომ მანდატებთან დაკავშირებით გადაწყვეტილებას მიიღებდნენ მაშინ და იმ ფორმით, როცა ამას გადაწყვეტენ.

ამ განცხადების შემდეგ მათ მანდატები არ ჩაუხსნიათ, თუმცა პარლამენტის სხდომებსაც არ ესწრებოდნენ.