2024 წელს ქართული ოცნების სატელიტი პარტიის, ხალხის ძალის შემოწირულებათა მოცულობა 218 750 ლარს შეადგენდა. საერთაშორისო გამჭვირვალობა საქართველოს ინფორმაციით, მიმდინარე წელს ხალხის ძალას შემოწირულებათა ბალანსზე 140 000 ლარია. აქედან მაისში მათ ანგარიშზე 30 000 ლარი ჩარიცხა ბიძინა ივანიშვილის დეიდაშვილმა, ბიზნესმენმა არჩილ მამაცაშვილმა, 50 000 ლარი — გიორგი კანდელაკმა, 60 000 — გიორგი დამენიამ.

შემოწირულებათა სტატისტიკის მიხედვით, ხალხის ძალის შემომწირველები წინა წლებში ქართული ოცნებას აფინანსებდნენ.

არჩილ მამაცაშვილმა 2012-2020 წლებში 6 შემოწირულება გააკეთა პარტია ქართულ ოცნებაში და სულ 48 600 ლარი გადარიცხა.

რაც შეეხება 2024 წელს, ხალხის ძალის შემომწირველებს შორის იყვნენ ამავე პარტიის წევრები გურამ მაჭარაშვილი და ვიქტორ ჯაფარიძე. ვიქტორ ჯაფარიძეს 38 000 ლარი აქვს შეწირული პარტიისთვის, მაჭარაშვილს — 1000 ლარი.

2012-2017 წლებში ვიქტორ ჯაფარიძეს ოთხი, სულ 120 000 ლარის შემოწირულება აქვს გაკეთებული ქართული ოცნებისთვის. გურამ მაჭარაშვილმა კი 2012 წელს ოცნებას 15 000 ლარი შესწირა.

საგულისხმოა, რომ სადაო ლეგიტიმაციის პარლამენტის დროებითი საგამოძიებო კომისია, სადაც გამოუცხადებლობისა და გირაოს გადაუხდელობისთვის ოპოზიციის 6 ლიდერი და ყოფილი თავდაცვის მინისტრი პატიმრობაში არიან, სწორედ ხალხის ძალის დეპუტატებითაა დაკომპლექტებული. 10-წევრიან კომისიაში 5 მანდატი ქართულ ოცნებას აქვს, დანარჩენი ოპოზიციას უნდა ჰქონდეს ათვისებული.

რაც შეეხება არჩილ მამაცაშვილს, 2023 წელს პარტია დროას ლიდერმა, ელენე ხოშტარიამ და გირჩი მეტი თავისუფლების ლიდერმა, ზურა ჯაფარიძემ განცხადება გაავრცელეს, სადაც ნათქვამი იყო, რომ ბიძინა ივანიშვილის დეიდაშვილის, უჩა მამაცაშვილის კორუფციული სქემა გამოავლინეს, სადაც მისი ძმა არჩილ მამაცაშვილის ფიგურირებს. 2025 წლის თებერვალში Forbes Georgia-მ გამოაქვეყნა სტატია: "ბანქოს სახლი ქართულად: მამაცაშვილის მამული ფართოვდება", სადაც ნათქვამია, რომ "უჩა მამაცაშვილმა წყნეთში მდიდრული რეზიდენციის მშენებლობის ნებართვის მოპოვება არარეალისტურად მჭიდრო ვადებში შეძლო. კაკლებში 9 000 კვადრატულ მეტრზე გადაჭიმული პრესტიჟული ნაკვეთის ნაწილი ძმამ, არჩილ მამაცაშვილმა თბილისის მუნიციპალიტეტისგან საბაზრო ღირებულებაზე ბევრად დაბალ ფასად შეიძინა და მოგვიანებით, უჩა მამაცაშვილს უსასყიდლოდ გადასცა". რამდენიმე დღეში განცხადება გაავრცელა მამაცაშვილის წარმომადგენელმა და სტატიას "პოლიტიკურად ანგაჟირებული და დეზინფორმაციული" უწოდა.