ლეგენდარული მუსიკოსი და სტილის სიმბოლო, ლენი კრავიცი თავისი პარიზული სახლით გვარწმუნებს, რომ ინტერიერი მხოლოდ ესთეტიკა კი არა, იდენტობისა და მემკვიდრეობის ისტორიაც არის. არქიტექტურულად გამორჩეული, 1920-იანი წლების სასახლე — წარსულში გრაფინია ან დ’ორნანოს საკუთრება — კრავიცმა ნეოკლასიკური ელემენტებით გაჯერებულ კულტურულ ოაზისად გარდაქმნა, რომელსაც თავად "Hotel de Roxie"-ს უწოდებს დედის პატივსაცემად.

ფოტო: Matthieu Salvaing

კრავიცის დიზაინის სტილი მიზანმიმართულად პირადულია. ყველა ოთახი ატარებს მის წარსულს, მუსიკალურ რიტმს და ადამიანურ მეხსიერებას. ინტერიერში შერწყმულია აფრიკული და ევროპული კულტურის ნიშნები — მარმარილოს იატაკზე ვხვდებით ბრუტალისტურ ავეჯს, ხოლო მაღალი ჭერიდან ჩამოშვებული კრისტალური ჭაღები სივრცეს საოცარ დრამატიზმს სძენს. სახლის დიზაინი თითქოს თავად მუსიკოსის კომპოზიციაა — თითოეული დეტალი ხაზგასმულია, მაგრამ ჰარმონიაშია მთლიანობასთან.

ფოტო: Matthieu Salvaing

მთელ სახლში იგრძნობა განსაკუთრებული მიდგომა ობიექტების მიმართ — თითოეული ნივთი რაღაცას გვეუბნება. პოლ ევანსის ავტორობით შექმნილი მძიმე, ბრუტალისტური კონსოლები, ხელნაკეთი ბრინჯაოს დეტალები და ვინტაჟური ნამუშევრები ქმნის იმ განცდას, რომ ეს სახლი როგორც ვიზუალური, ისე ემოციური არტეფაქტების კოლაჟია.

ფოტო: Matthieu Salvaing

ერთ-ერთი ყველაზე შთამბეჭდავი ნივთი არის კრავიცის დიზაინით შექმნილი ფორტეპიანო Steinway & Sons-თან თანამშრომლობით — ეს მუსიკალური ინსტრუმენტი ერთგვარი სკულპტურაა.

სახლში იმალება სიურპრიზიც — ღამის კლუბის სტილში მოწყობილი სარდაფი, რომელიც მეგობრული თავშეყრისთვის არის განკუთვნილი. კლუბურ ატმოსფეროს ქმნის ფერადი განათება, ბარი და მუსიკისათვის განკუთვნილი სივრცე — ზუსტად ისეთი, როგორიც კრავიცის კულისებს მიღმა ცხოვრებაა.

ფოტო: Matthieu Salvaing

ფოტო: Matthieu Salvaing

ამ სახლის თითოეულ ოთახში იგრძნობა ის, რაც კრავიცს თავის ხელოვნებაში გამოარჩევს — ღრმა განცდები, მრავალშრიანი სტრუქტურა და ინდივიდუალიზმი. "Hotel de Roxie" — ეს არის არა მხოლოდ საცხოვრებელი სივრცე, არამედ არტ-ობიექტი, მემორიალი და შთაგონება.