აზერბაიჯანის საგარეო საქმეთა სამინისტრომ უარყო სომხეთში ირანის ელჩის, მეჰდი სობჰანის, მინიშნებები იმის შესახებ, თითქოს ბაქომ ისრაელს თავისი ტერიტორიის გამოყენების უფლება ირანზე თავდასხმისთვის გამოიყენა.

27 ივნისს სობჰანიმ განაცხადა: "მივიღეთ ინფორმაცია, რომ მცირე რაოდენობის უპილოტო აპარატები ირანის ტერიტორიაზე შევიდა მეზობელი ქვეყნების ტერიტორიიდან. შესაბამისად, ირანისა და აზერბაიჯანის პრეზიდენტებს შორის სატელეფონო საუბრისას, ჩვენს პრეზიდენტს ალიევისთვის მიუმართავს თხოვნით, სერიოზულად გამოიძიოს ეს საკითხი. ჩვენ დაველოდებით გამოძიების შედეგებს.

შესაძლებელია, რომ ჩვენმა მტერმა [ისრაელმა] ისარგებლა ჩვენი მეზობელი ქვეყნის ტერიტორიით. აზერბაიჯანმა დაგვარწმუნა, რომ ის არ დაუშვებს საკუთარი ტერიტორიის გამოყენებას ირანზე თავდასხმისთვის. თუმცა, ჩვენ კარგად ვიცით ისინი [ისრაელი] არ იცავენ არავითარ წესებსა და კანონებს. ამიტომ კვლავ არსებობს ალბათობა, რომ მათ შეძლეს მომენტით სარგებლობა."

მიუხედავად იმისა, რომ სობჰანიმ აზერბაიჯანი პირდაპირ არ დაადანაშაულა, ბაქომ მკაცრად უპასუხა. საგარეო საქმეთა სამინისტროს სპიკერმა აიხან ჰაჯიზადამ სობჰანის კომენტარები "ღია პროვოკაციად" შეაფასა.

"აზერბაიჯანი კატეგორიულად უარყოფს ბრალდებებს, რომ მისი საჰაერო სივრცე ან ტერიტორია გამოყენებულ იქნა რომელიმე ქვეყნის მიერ სამხედრო ოპერაციებისთვის ირანისა ან სხვა რომელიმე ქვეყნის წინააღმდეგ. მსგავსი მტკიცებები უსაფუძვლოა და არ გააჩნია არანაირი სანდო მტკიცებულება.

მოველით, რომ ირანი მსგავს ნაბიჯებს, რომლებიც შეუფერებელია ჩვენი ურთიერთობების სულისკვეთებისთვის, შეაჩერებს და ასევე მიიღებს შესაბამის ზომებს ელჩის მიერ გაჟღერებულ მოსაზრებებთან დაკავშირებით, რომელიც რეგულარულად ავლენს პროსომხურ პოზიციას და არ წარმოადგენს საკუთარი ქვეყნის ინტერესებს", — განაცხადა ჰაჯიზადამ.

ეს წინააღმდეგობები წინ უსწრებდა ირანის პრეზიდენტ მასუდ პეზეშკიანსა და აზერბაიჯანის პრეზიდენტ ილჰამ ალიევს შორის სატელეფონო საუბარს, სადაც პეზეშკიანმა ალიევს სთხოვა გამოერკვია, გამოიყენა თუ არა ისრაელმა აზერბაიჯანის ტერიტორია ირანზე თავდასხმისთვის.

ბაქოსა და თეირანს შორის გამწვავებული დაპირისპირება აზერბაიჯანულ მედიაშიც აისახა. პროსამთავრობო მედიასაშუალება Caliber-მა გამოაქვეყნა კრიტიკული სტატია ირანის უზენაესი ლიდერის, ალი ხამენეის წინააღმდეგ სათაურით: "ხამენეი და მისი ომი აზერბაიჯანზე: სიძულვილის ფესვები."

სტატიაში ხამენეის პერსონალურად აკრიტიკებენ და ამტკიცებენ, რომ "ის დგას ყველა ანტიაზერბაიჯანული პროვოკაციის, დეზინფორმაციის კამპანიისა და ქვეყნის წინააღმდეგ მიმართულ ინიციატივათა უკან."

გარდა ამისა, სტატიაში ნათქვამია, რომ ხამენეი შესაძლოა სომხური წარმოშობის იყოს, თუმცა ამ ამბის არანაირი მტკიცებულება არ მოჰყავს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.