ჰენრი კისინჯერი 100 წლის ასაკში გარდაიცვალა
![ჰენრი კისინჯერი](http://joey.on.ge/2023/11/30/henry-kissinger-ap-moe-021-230531_1685552928046_hpMain.jpg)
ფოტო: Evan Vucci / AP / FILE
რა ხდება: აშშ-ის ყოფილი სახელმწიფო მდივანი ჰენრი კისინჯერი, რომელმაც ცივი ომის დროს გადამწყვეტი როლი ითამაშა აშშ-ის საგარეო პოლიტიკაში, 100 წლის ასაკში გარდაიცვალა.
- ის ნიქსონისა და ფორდის ადმინისტრაციების დროს მსახურობდა ამერიკის მთავარ დიპლომატად და ეროვნული უსაფრთხოების მრჩევლად.
- წარმოშობით გერმანელი დიპლომატი საკუთარ სახლში, კონექტიკუტში გარდაიცვალა.
- კისინჯერის გარდაცვალების შესახებ ღამით მის განცხადება გაავრცელა მის მიერ დაარსებულმა საკონსულტაციო კომპანიამ Kissinger Associates, თუმცა მიზეზის შესახებ არაფერი უთქვამთ.
ვინ იყო ჰენრი კისინჯერი: ის 1923 წელს გერმანიაში დაიბადა, აშშ-ში პირველად 1938 წელს ჩავიდა, როდესაც მისი ოჯახი ნაცისტებს გაექცა. მშობლიური ბავარიული აქცენტი მას სიცოცხლის ბოლომდე არ დაუკარგავს.
- 1943 წელს კისინჯერი აშშ-ის მოქალაქე გახდა, ის მსახურობდა ამერიკის ჯარში, მოგვიანებით — კონტრდაზვერვის კორპუსში.
- კისინჯერმა საერთაშორისო ურთიერთობების ფაკულტეტი ჰარვარდში დაამთავრა.
- 1969 წელს, მაშინდელმა პრეზიდენტმა ნიქსონმა ის უსაფრთხოების საკითხებში მრჩევლად დანიშნა, რამაც საშუალება მისცა, ჰქონოდა დიდი გავლენა ამერიკის საგარეო პოლიტიკაზე.
- რვა წლის განმავლობაში, 1969-77 წლებში, კისინჯერის ეროვნული უსაფრთხოების მრჩევლისა და სახელმწიფო მდივნის თანამდებობაზე ყოფნის დროს, შეერთებულმა შტატებმა საბოლოოდ დაასრულა მონაწილეობა ვიეტნამის ომში, გახსნა ურთიერთობები ჩინეთთან.
რეაქციები ჩინეთში: ქვეყანაში, სადაც კისინჯერი პოპულარობით სარგებლობდა, მისი გარდაცვალების ამბავი მალევე გახდა მთავარი განხილვის თემა ადგილობრივ პლატფორმაზე Weibo.
- ჩინეთის მედიამ ნეკროლოგებში მას "ჩინელი ხალხის ძველი მეგობარი" და "ლეგენდარული დიპლომატი" უწოდა, რომელმაც მნიშვნელოვანი როლი ითამაშა აშშ-ჩინეთის ურთიერთობებში.
- კისინჯერს აქტიური ცხოვრების წესი ჰქონდა 100 წლის ასაკშიც კი. ის ივლისში, მოულოდნელი ვიზიტით, პეკინში ჩავიდა, პრეზიდენტ სი ძინპინთან შესახვედრად. მიუხედავად აშშ-სა და ჩინეთის დაძაბული ურთიერთობისა, ამერიკელ დიპლომატს პეკინში განსაკუთრებული პატივით უმასპინძლეს.
წლების განმავლობაში, კისინჯერს ადანაშაულებდნენ რეპრესიული რეჟიმების მხარდაჭერაში მთელ მსოფლიოში, მათ შორის — პინოჩეტის რეჟიმის, ჩილეში.
- კისინჯერი ბრალდებებს უარყოფდა.
- 1973 წელს მას მიენიჭა ნობელის პრემია მშვიდობის დარგში ჩრდილოეთ ვიეტნამელ ლე დუკ ტოსთან ერთად, რომელმაც უარი თქვა ჯილდოს მიღებაზე.
- იმის მიუხედავად, რომ კისინჯერმა მთავრობაში მუშაობა 1977 წელს დაასრულა, მისგან რჩევას იღებდა არაერთი პრეზიდენტი, ჯონ კენედიდან ჯო ბაიდენამდე. ის კონსულტაციებს აძლევდა კანონმდებლებსაც.
კისინჯერს ჰყავს ცოლი, ნენსი კისინჯერი, 2 შვილი — ელიზაბეტ და დევიდ კისინჯერები და 5 შვილიშვილი.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები