სოფელ ბერშუეთში საზღვრის გადმოწევის თემაზე გირჩი განცხადებას ავრცელებს, რასაც საერთაშორისო სამართლის უხეშ დარღვევას და საქართველოს ეროვნული სუვერენიტეტის ხელყოფას უწოდებს.

გირჩი აცხადებს, რომ ხელისუფლება ვალდებულია, შესაბამისი პასუხი გასცეს საქართველოს ნაციონალური სუვერენიტეტის წინააღმდეგ მიმართულ ქმედებას.

გირჩი აცხადებს, რომ რუსეთის ქმედება კიდევ ერთხელ ადასტურებს იმას, რომ 2012 წლის ბოლოდან ქართული ოცნების მიერ გატარებულმა პოლიტიკამ რუსეთის მხრიდან საქართველოსადმი აგრესიული დამოკიდებულება ვერ შეცვალა.

პარტია ხელისუფლებას ყალბი მოლოდინების შექმნაში ადანაშაულებს და რუსეთის მიმართ მეტი პრინციპულობის გამოჩენისკენ მოუწოდებს.

გირჩის განცხადება:

  1. რუსეთის ფედერაციის მორიგი მცდელობა - ფსევდო-სახელმწიფოს ე.წ. ადმინისტრაციული საზღვრის გავლებისა და უკანონო ბორდერიზაციის - არის საერთაშორისო სამართლის უხეში დარღვევა და საქართველოს ეროვნული სუვერენიტეტის ხელყოფა.
  2. რუსეთის ფედერაცია ცდილობს, შეარყიოს საერთაშორისო სამართლის ის სისტემა, რომელზეც დაფუძნებულია თანამედროვე საერთაშორისო წესრიგი.
  3. ქვეყნის შიგნით მომხდარ ნებისმიერ უკანონობაზე, მით უმეტეს ეროვნული სუვერენიტეტის თვალსაჩინო დარღვევის ფაქტზე, ხელისუფლებას ეკისრება ვალდებულება, შესაბამისი პასუხი გასცეს საქართველოს ნაციონალური სუვერენიტეტის წინააღმდეგ მიმართულ ქმედებას.
  4. ახალი ბანერის დადგმით, კიდევ ერთხელ დასტურდება, რომ 2012 წლის ბოლოდან რუსეთის ფედერაციასთან წარმოებული პოლიტიკა და მოლოდინი, რომ მოსკოვი შეცვლიდა საქართველოს მიმართ აგრესიულ დამოკიდებულებას, აღმოჩნდა უარყოფითი შედეგის მომტანი ილუზია; საქართველოს მოქალაქეებისა და საქართველოს საერთაშორისო პარტნიორების იმაში დარწმუნებამ, რომ „ქართული ოცნება“ შეძლებდა რუსეთთან ურთიერთობების დარეგულირებას, შექმნა ყალბი მოლოდინები ქვეყნის შიგნით, ხოლო ქვეყნის გარეთ საქართველოს ტერიტორიების ოკუპაციის საკითხი საერთაშორისო დღის წესრიგის ყველაზე პრიორიტეტული საკითხებიდან ამოაგდო. ორივე შემთხვევაში, ამ პოლიტიკამ დააზიანა საქართველოს სასიცოცხლო ინტერესები.
  5. საქართველოს ხელისუფლებამ ხუთი წლის თავზეც ვერ შეძლო, ოკუპაციისა და ანექსიის წინააღმდეგ ეფექტური და გასაგები სტრატეგიის შექმნა. ანტისაოკუპაციო და ანტიანექსიური სტრატეგიის გარეშე შეუძლებელია წარმატებით გავუმკლავდეთ რუსეთის ფედერაციის მხრიდან ე.წ. „საზღვრის“ გადმოწევის ახალ ფაქტებს.
  6. ანტიანექსიური სტრატეგიის გარეშე საქართველოს საგარეო საქმეთა სამინისტრო ვერ შეძლებს საერთაშორისო პარტნიორებთან ეფექტურ მუშაობას.
  7. გაკვირვებას იწვევს ის ფაქტი, რომ საქართველოს საგარეო საქმეთა სამინისტროს ოფიციალური განცხადება სოფელ ბერშუეთის მიმართულებით ახალი ბანერის დამონტაჟების შესახებ გამოქვეყნდა მხოლოდ 4 ივლისს, მას შემდეგ, რაც საზოგადოებისთვის მედიის საშუალებით გახდა ცნობილი ფაქტის შესახებ.
  8. აღმაშფოთებელია, რომ იმავე 4 ივლისს ევროპის კავშირის სადამკვირვებლო მისიის მიერ გაკეთებულ განცხადებაში ვკითხულობთ, რომ ახალი ბანერი საოკუპაციო რეჟიმის მიერ დამონტაჟდა მიმდინარე წლის 19 ივნისს. გამოდის, რომ საგარეო საქმეთა სამინისტროს აღნიშნულის შესახებ დროული ინფორმაცია არ მიაწოდეს იმ სამინისტროებმა, რომლებიც უშუალოდ არიან პასუხისმგებელნი ქვეყნის უსაფრთხოებასა და საზღვრის დაცვაზე, შესაბამისად, დაგვიანდა საქართველოს დიპლომატიური სამსახურის მიერ საერთაშორისო ორგანიზაციების, მეგობარი სახელმწიფოებისა და საერთაშორისო პარტნიორების ინფორმირება რუსეთის მხრიდან განხორციელებულ მორიგ პროვოკაციაზე.
  9. ტრაგიკულია, რომ საქართველოს ტერიტორიების მიმდინარე ანექსიის დროს, „ქართული ოცნება“ ქვეყნის თავდაცვისუნარიანობის გაზრდისა და ეროვნული სუვერენიტეტის გამტკიცებაზე მეტად, ხელისუფლებაში ყოფნის გახანგრძლივების გზებზე ზრუნავს.
  10. მოვუწოდებთ ხელისუფლებას, გამოიჩინოს მეტი კომპეტენცია, დიპლომატიური მოქნილობა და პრინციპულობა რუსეთის საოკუპაციო რეჟიმის მხრიდან უკანონო ბორდერიზაციის ფაქტებისა და ზოგადად, რუსეთის ფედერაციის მხრიდან მომდინარე პროვოკაციებისა და საფრთხეების მიმართ; დაუყოვნებლივ დაიწყოს მუშაობა ანტიანექსიური და ანტიოკუპაციური სტრატეგიის ჩამოყალიბებაზე, პროცესში საქართველოს საერთაშორისო პარტნიორებისა და ძირითადი პოლიტიკური პარტიების ჩართულობით; უკანონო ბორდერიზაციის ყველა ფაქტზე მოხდეს საერთაშორისო ალარმიზაცია რუსეთის ფედერაციაზე საერთაშორისო ზეწოლის გაძლიერების მიზნით.