ჯოზეფ ბორელი, ევროკავშირის უმაღლესი წარმომადგენელი საგარეო ურთიერთობებისა და უსაფრთხოების საკითხებში, საქართველოში 7 სექტემბერს ჩამოვიდა. ვიზიტის მთავარი მიზანი ქვეყნის ოფიციალურ პირებთან საქართველოს ევროინტეგრაციის გზაზე არსებული პროგრესის განხილვა იყო.

რატომ არის მნიშვნელოვანი: 2022 წლის ივნისში ევროპულმა საბჭომ მოლდოვასა და უკრაინას — კანდიდატის სტატუსი, ხოლო საქართველოს ევროპული პერსპექტივა მიანიჭა.

• საქართველოს შემთხვევაში სტატუსის წინაპირობად 12 რეკომენდაციის შესრულება განისაზღვრა.
• ევროკომისიის მიერ 21 ივნისს წარდგენილ ზეპირ, შუალედურ მოხსენებაში ნათქვამია, რომ აღნიშნული 12 რეკომენდაციიდან საქართველოს მხოლოდ 3 აქვს სრულად შესრულებული.
• მორიგ შეფასებას ევროკომისია 2023 წლის ოქტომბერში გამოაქვეყნებს.

დეტალები: საქართველოში ვიზიტისას ჯოზეფ ბორელი შეხვდა საგარეო საქმეთა მინისტრს, პრემიერმინისტრს, პრეზიდენტს, პარლამენტის თავმჯდომარესა და სამოქალაქო საზოგადოების წარმომადგენლებს.

• აღნიშნული შეხვედრები, გარდა პრემიერმინისტრთან ერთად გამართული პრესკონფერენციისა, დახურულ კარს მიღმა მიმდინარეობდა.
• ღარიბაშვილისა და ბორელის ერთობლივი პრესკონფერენცია 8 სექტემბერს გაიმართა, რომლის დროსაც ბორელმა მისი სამი მთავარი გზავნილი გააჟღერა.

პირველი გზავნილი იყო ის, რომ საქართველო ნამდვილად მიეკუთვნება ევროპულ ოჯახს.

• მისი თქმით, ჩამოსვლისთანავე მოიხიბლა იმით, რომ თბილისში ძალიან ბევრი ევროპული დროშა ფრიალებს, იმაზე მეტიც კი, ვიდრე ბრიუსელში.
• თუმცა, ამასთანავე აღნიშნა, რომ ევროინტეგრაციის გზაზე შემდეგი ნაბიჯები დამოკიდებული იქნება დამსახურებაზე, ამიტომ მნიშვნელოვანია ყველა პოლიტიკური ძალა გაერთიანდეს იმისთვის, რომ ეს ისტორიული შანსი არ იქნეს დაკარგული.
• "ამოცანები არის კარგად და მკაფიოდ გაწერილი 12 პრიორიტეტის სახით. თქვენ შეასრულეთ სამი მათგანი და დანარჩენი ცხრა პროცესშია", — აღნიშნა ევროკომისიის ვიცეპრეზიდენტმა.
• ბორელმა ასევე ხაზი გაუსვა იმას, რომ მუშაობა 12 პრიორიტეტის შესრულებაზე ნამდვილად ღირს შედეგად.
• "რთული სამუშაოს გაწევა არ არის იმისთვის, რომ ესიამოვნოს ბრიუსელს, არამედ იმისთვის, რომ გააუმჯობესოს საქართველოს მოქალაქეების ცხოვრება", — აღნიშნა მან.
• ის ასევე გამოეხმაურა პრეზიდენტის იმპიჩმენტის საკითხს. მისი შეფასებით, ეს არის რისკი, რაც კიდევ უფრო დაძაბავს სიტუაციას და გაზრდის პოლარიზაციას.

მეორე გზავნილი უკავშირდება რუსეთის აგრესიას უკრაინაში.

• ბორელმა კიდევ ერთხელ დააფიქსირა მათი მხარდაჭერა უკრაინის მიმართ და აღნიშნა, რომ ეს გაგრძელდება იქამდე, სანამ საჭირო იქნება.
• ამ საკითხზე საუბრისას ის გამოეხმაურა საქართველოსა და რუსეთს შორის ფრენების აღდგენასაც და თქვა, რომ ეს ძალიან სამწუხარო ფაქტია.
• მისი თქმით, საქართველომ ასოცირების შეთანხმების ფარგლებში მიიღო გარკვეული ვალდებულებები და ამ მხრივ, ბევრი მიმართულება არის გასაუმჯობესებელი.
• "ჩვენ გვჭირდება რუსეთის ჰიბრიდული საქმიანობის აღკვეთა. ზუსტად ამისთვის, ევროკავშირში აქცენტი კეთდება დამოუკიდებელი სამოქალაქო საზოგადოების გაძლიერებაზე საქართველოში", — აღნიშნა მან.

მესამე გზავნილი ეხება ევროკავშირის ურყევ მხარდაჭერას საქართველოს ტერიტორიული მთლიანობისადმი.

• ბორელმა თქვა, რომ რუსეთის უკრაინაში შეჭრის შემდეგ, დღეს განსაკუთრებით ძლიერია ევროკავშირის ურთიერთობა საქართველოსთან.
• "ჩვენ გავაგრძელებთ საქართველოს გვერდით დგომას და ეს არ არის უბრალოდ სიტყვები".
• კონფერენციის დასრულების შემდეგ ბორელი საოკუპაციო ხაზთანაც იმყოფებოდა.