სოციალური სამართლიანობის ცენტრი ყვარელში განვითარებულ მოვლენებს ეხმაურება.

რატომ არის მნიშვნელოვანი: ყვარელში, სასტუმრო ყავრლის ტბასთან საპროტესტო აქცია დილიდან იმართება, სადაც ლავროვის სიძის, ალექსანდრ ვინოკუროვის ძმა, მიკა ვინო, იგივე მოშე ვინოკუროვი ქორწილი უნდა გადაეხადა.

• ადგილზე მობილიზებულები იყვნენ შინაგან საქმეთა სამინისტროს წარმომადგენლების დიდი რაოდენობა, მათ შორის, ნიღბიანი სამართალდამცავები.
• მათ ძალის გამოყენებით დააკავეს აქციის მონაწილეებს და ტერიტორიიდან გაიყვანეს.
• დაკავებულია 20-მდე აქტივისტი, მათ შორის, დროას ლიდერი, ელენე ხოშტარია.

დეტალები: ორგანიზაცია სამართალდამცავებს მოუწოდებს, უზრუნველყონ აქტივისტების შეკრებისა და მანიფესტაციის უფლება და ხელი არ შეუშალონ მედიის საქმიანობას.

• ცენტრი თვითმხილველებზე დაყრდნობით აცხადებს, რომ პოლიცია იყენებს არაპროპორციულ ძალას, ხოლო მედიას არ ეძლევა მოვლენების დაუბრკოლებლად გაშუქების შესაძლებლობა.
• "განსაკუთრებულ პრობლემას ქმნის დაკავების შემდგომ დაკავებულების ადვოკატზე წვდომის შეზღუდვა, რადგან სამართლებრივ დახმარებას არსებითი მნიშვნელობა სწორედ დაკავების საწყის პერიოდში აქვს, პოლიციის მხრიდან იძულების გზით ადმინისტრაციული წესით დაკავებულისგან ინფორმაციის მიღების რისკების არსებობის გამო".
• სოციალური სამართლიანობის ცენტრში აღნიშნავენ, რომ იმ პირობებში, როცა საქართველო ოკუპაციის რეჟიმში და ამავდროულად კანდიდატის სტატუსის მოლოდინშია, რუსი მაღალჩინოსნების ოჯახის წევრების შემოშვება საფრთხეს უქმნის სამოქალაქო მშვიდობას, ეროვნულ ინტერესებსა და ევროინტეგრაციას.

გარდა ამისა, მათივე თქმით, ჩნდება არაერთი კითხვა საზღვრის კონტროლზეც. ამბობენ, რომ იმ ფონზე, კრიტიკულად განწყობილ აქტივისტსებსა და ჟურნალისტსებს მეზობელი ქვეყნიდან შემოსვლაზე უარს ეუბნება, ბუნდოვანია, როგორ შეიძლება შსს-ს თანამშრომლებს დასანქცირებული რუსების შემოსვლა არ დაედინტიფიცირებინათ.

• "ეს გადაწყვეტილება, წარსულში სერგეი გავრილოვისა და ვლადიმერ პოზნერის საქართველოში შემოსვლის გადაწყვეტილებებთან და ამ ფონზე გაკეთებულ პოლიტიკურ განცხადებებთან ერთად, ამგვარი ფიგურების საქართველოში შემოსვლის საკითხზე პოლიტიკურ ლოიალობას უფრო აჩვენებს და შეუძლებელია მხოლოდ საზღვარზე შესაბამისი სამსახურების მუშაობის არაეფექტიანობით ავხსნათ".
• პრობლემურს უწოდებენ პროცესში ჭარბი საპოლიციო ძალის გამოყენებასა და ამ გზით პოლიტიკური კონფლიქტის გადაწყვეტას.
• "ხელისუფლება აქამდე მრავალგზის ნაცად ადმინისტრაციულ მექანიზმებთან ერთად, კვლავ იყენებს მძიმე რეპრესიულ პოლიტიკას და პროტესტის გამოხატვის მიზანმიმართული ხელშეშლის ინტერესით, უხეშად ერევა გამოხატვისა და მშვიდობიანი შეკრების უფლებებში".

მოუწოდებენ შსს, თავი შეიკავონ უკანონო ბრძანების შესრულებისგან და აქციის მონაწილეების წინააღმდეგ არაპროპორციული ძალის გამოყენებისგან.

• ასევე, უზრუნველყონ ჟურნალისტების თავისუფალი და შეუფერხებელი საქმინობა.
• დაკავებულების ადვოკატებს დროულად მიეცეთ დაკავებულებთან კონსულტაციის საშუალება და დაუყოვნებლივ მოხდეს მათი გადაყვანა სასამართლოში.
• გარდა ამისა, მოუწოდებენ სპეციალურ საგამოძიებოს, დაინტერესდნენ პოლიციის მხრიდან შესაძლო ძალის გადამეტების ფაქტებით და მოუახდინონ სათანადო რეაგირება.