ამის შესახებ ეკონომიკის მინისტრმა მთავრობის ადმინისტრაციაში გამართულ ბრიფინგზე ისაუბრა.

რატომ არის მნიშვნელოვანი: უვიზო რეჟიმი რუსეთთან 2008 წლის აგვისტოს ომის შემდეგ გაუქმდა, 2012 წელს კი საქართველოს მხრიდან ცალმხრივად აღდგა. ხოლო პირდაპირი ფრენები 2019 წლის 20 ივნისის შემდეგ ვლადიმერ პუტინმა თავად აკრძალა.

• მაშინ, როცა ცივილიზებული მსოფლიო ოკუპანტ ქვეყანას სანქციებს უწესებს და იზოლაციაში აქცევს, საქართველო სანქციებს არ უერთდება, თან ქართული ოცნების ხელისუფლების მხრიდან რუსეთთან ურთიერთობის დათბობის მცდელობები უკვე დიდი ხანია შესამჩნევია.
• სერგეი ლავროვიც კი ამბობდა, რომ მმართველი გუნდის გადაწყვეტილებებით კმაყოფილები არიან და შესაბამის დიპლომატიურ ნაბიჯებს გადადგამდნენ.
• 2022 წლის დეკემბერში რუსეთის საგარეო საქმეთა მინისტრის მოადგილემ თქვა ისიც, რომ თანამშრომლობა ვითარდებოდა და თუ ასე გაგრძელდებოდა, უვიზო რეჟიმის გაუქმებასაც არ გამორიცხავდნენ.
• 2023 წლის თებერვალში რუსეთის ფედერაციის საბჭოს საერთაშორისო საქმეთა კომიტეტის თავმჯდომარე კი ამტკიცებდა, რომ საქართველოდან პირდაპირი ფრენების აღდგენა შესთავაზეს.
• ქართულ ოცნებაში ამას არ ადასტურებდნენ, მაგრამ ფრენების აღდგენის იდეას ყოველთვის მიესალმებოდნენ.
• შედეგად, პუტინის ბრძანებით, 15 მაისიდან საქართველოს მოქალაქეებისთვის სავიზო რეჟიმი გაუქმდება.
• აგრესორმა პრეზიდენტმა, გაუქმა თავისივე შეზღუდვაც, რომელიც რუსულ ავიაკომპანიებს საქართველოში ფრენას უკრძალავდა.

დეტალები: დავითაშვილის თქმით, რუსულთან ერთად, ქართული ავიაკომპანიებისგანაც ფრენებზე მოთხოვნა პუტინის გადაწყვეტილების მიღებისთანავე მიიღეს.

• ამბობს, რომ საავიაციო სააგენტოს ექსპერტებთან ერთად ინტენსიური მუშაობა ჰქონდათ, შეისწავლეს სხვა ქვეყნების მაგალითები და "მსოფლიოში ყველაზე მკაცრ მიდგომაზე" შეჯერდნენ.
• როგორც დავითაშვილი განმარტავს, ფრენების დაშვებაზე გადაწყვეტილების მიღებისას ორი კრიტერიუმით იხელმძღვანელებენ.
• მისი თქმით, დაიშვებიან ბორტები, რომლებიც გადიან ტექნიკურ შემოწმებას და სამოქალაქო ავიაციის საერთაშორისო საბჭოს მოთხოვენს აკმაყოფილებენ და ასევე, ისინი, რომლებსაც "საერთაშორისო თანამეგობრობის მხრიდან არ აქვთ პრობლემა".
• "ჩვენ წავედით ყველაზე უფრო კონსერვატიული მიდგომით, ჩვენ მაქსიმალურად ვაზღვევთ უსაფრთხოების საკითხზე, მგზავრთა უსაფრთხოებაზე, გადაზიდვებზე".

დავითაშვილი ამბობს, რომ პირდაპირი ფრენების აღდგენას კომერციულ მნიშვნელობასთან ერთად, "სოციალური მნიშვნელობაც აქვს".

• "საქართველოს მოქალაქეები, ან ეთნიკურად ქართველები მცხოვრები რუსეთის ფედერაციაში ხშირად ვერ სარგებლობენ პირდაპირი ავიამიმოსვლით, არ ჰქონდათ წვდომა ოჯახებთან, აქედან და იქიდან და ეს რა თქმა უნდა, მათ სოციალურ მდგომარეობას და მათ პირობებს გააუმჯობესებს", — თქვა მან.
• ეკონომიკის მინისტრი, ასევე, ამტკიცებს, რომ საქართველოს უსაფრთხოების კუთხით "არანაირი პრობლემა არ ექნება", რადგან ქვეყანამ "ყველაზე მკაცრი მიდგომა აირჩია".

აეროპორტების გაერთიანებაში დღეს განაცხადეს, რომ ფრენებს მხოლოდ არასანქცირებული კომპანიები შეასრულებენ.

• საუბარია შოთა რუსთაველის სახელობის თბილისის, დავით აღმაშენებლის სახელობის ქუთაისისა და ალექსანდრე ქართველის სახელობის ბათუმის საერთაშიროსო აეროპორტებზე.
• "განსხვავებული მიდგომა არცერთ საერთაშორისო აეროპორტს შორის არ იქნება", — დააზუსტეს მათ.