რატომ არის მნიშვნელოვანი: უვიზო რეჟიმი რუსეთთან 2008 წლის აგვისტოს ომის შემდეგ გაუქმდა, 2012 წელს კი საქართველოს მხრიდან ცალმხრივად აღდგა. ხოლო პირდაპირი ფრენები 2019 წლის 20 ივნისის შემდეგ ვლადიმერ პუტინმა თავად აკრძალა.

• მაშინ, როცა ცივილიზებული მსოფლიო ოკუპანტ ქვეყანას სანქციებს უწესებს და იზოლაციაში აქცევს, საქართველო სანქციებს არ უერთდება, თან ქართული ოცნების ხელისუფლების მხრიდან რუსეთთან ურთიერთობის დათბობის მცდელობები უკვე დიდი ხანია შესამჩნევია.
• სერგეი ლავროვიც კი ამბობდა, რომ მმართველი გუნდის გადაწყვეტილებებით კმაყოფილები არიან და შესაბამის დიპლომატიურ ნაბიჯებს გადადგამდნენ.
• 2022 წლის დეკემბერში რუსეთის საგარეო საქმეთა მინისტრის მოადგილემ თქვა ისიც, რომ თანამშრომლობა ვითარდებოდა და თუ ასე გაგრძელდებოდა, უვიზო რეჟიმის გაუქმებასაც არ გამორიცხავდნენ.
• 2023 წლის თებერვალში რუსეთის ფედერაციის საბჭოს საერთაშორისო საქმეთა კომიტეტის თავმჯდომარე კი ამტკიცებდა, რომ საქართველოდან პირდაპირი ფრენების აღდგენა შესთავაზეს.
• ქართულ ოცნებაში ამას არ ადასტურებდნენ, მაგრამ ფრენების აღდგენის იდეას ყოველთვის მიესალმებოდნენ.
• შედეგად, პუტინის ბრძანებით, 15 მაისიდან საქართველოს მოქალაქეებისთვის სავიზო რეჟიმი გაუქმდება.
• აგრესორმა პრეზიდენტმა, გაუქმა თავისივე შეზღუდვაც, რომელიც რუსულ ავიაკომპანიებს საქართველოში ფრენას უკრძალავდა.

დეტალები: თბილისის აეროპორტების გაერთიანებაში აცხადებენ, რომ სამივე საერთაშორისო აეროპორტში ფრენები მხოლოდ შესრულდება იმ ავიაკომპანიების მიერ და იმ ბორტებით, რომლებიც არ არიან სანქცირებულთა სიაში.

• საუბარია შოთა რუსთაველის სახელობის თბილისის, დავით აღმაშენებლის სახელობის ქუთაისისა და ალექსანდრე ქართველის სახელობის ბათუმის საერთაშიროსო აეროპორტებზე.
• "განსხვავებული მიდგომა არცერთ საერთაშორისო აეროპორტს შორის არ იქნება", — აზუსტებენ ისინი.

გარდა ამისა, განცხადება გაავრცელა სამოქალაქო ავიაციის სააგენტომაც.

• მათი თქმით, გამომდინარე "საქართველოს მტკიცე პოზიციიდან", რომ ფრენებს მხოლოდ არასანქცირებული ავიაკომპანიები შეასრულებენ, ყველა განაცხადს დეტალურად შეისწავლიან და სხვადასხვა მექანიზმით გადაამოწმებენ.
• ასევე, ამბობენ, რომ აქვთ კონსულტაციები და სწავლობენ მაგალითებს ყველა იმ სახელმწიფოსგან, რომლებიც იცავენ სანქციებს და აქვთ პირდაპირი მიმოსვლა რუსეთთან.
• სააგენტოს ცნობით, მათთან შესულია რამდენიმე ავიაკომპანიის განაცხადი საქართველო-რუსეთს შორის რეგულარული საჰაერო მიმოსვლის განხორციელებაზე.
• "სააგენტოში წარმოდგენილ თითოეულ მომართვასთან დაკავშირებით, გადაწყვეტილება მიღებული იქნება მას შემდეგ, რაც დეტალურად იქნება შესწავლილი ავიაკომპანიების თუ მათი საჰაერო ხომალდების არსებული სტატუსი საერთაშორისო სანქციებთან თუ შეზღუდვებთან მიმართებაში და ფრენის ნებართვები ზემოთ აღნიშნული პრინციპით იქნება გაცემული".

პარალელურად, მოქალაქეებმა პეტიცია შექმნეს, რითიც რუსეთთან სავიზო რეჟიმის შემოღებას და პირდაპირ ფრენებზე უარის თქმას ითხოვენ.

• ხელმომწერები მოუწოდებენ საქართველოს ხელისუფლებას, უარი თქვას რუსეთთან ფარულ გარიგებებზე და საქართველოს კონსტიტუციის შესაბამისად მიიღოს ყველა ზომა ევროკავშირში ინტეგრაციისათვის.
• ამ დროისთვის [12:13] პეტიციას 6 309 ხელმომწერი ჰყავს.