ინფორმაციას არხის პროდიუსერი, გიორგი ლაფერაშვილი ავრცელებს.

რატომ არის მნიშვნელოვანი: 6 თებერვალს პარლამენტის თავმჯდომარის, შალვა პაპუაშვილის მიერ გაცემული ბრძანებით, მედიას ახალი შეზღუდვები დაუწესდა.

  • შეზღუდვებს არასამთავრობო ორგანიზაციების კრიტიკა და პაპუაშვილისთვის მოწოდება მოჰყვა, ბრძანება გააუქმებინა, თუმცა, უშედეგოდ.
  • ლაფერაშვილი წერს, რომ აკრედიტაცია შაბათის ფორმულას ჟურნალისტს, სოფო გოზალიშვილსა და გადაცემის ოპერატორს შეუჩერდათ.

დეტალები: ბრძანებით, მედიის წარმომადგენლებს ევალებათ კონკრეტული "ქცევის წესების დაცვა", მათ შორის, ერთ-ერთი კი პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ უარი შემთხვევაში, ინტერვიუს შეწყვეტაა.

  • სწორედ ამ ქვეპუნქტის დარღვევას ედავებიან ფორმულას გადამღებ ჯგუფს.
  • საუბარია პირველი აპრილს გასულ სიუჟეტზე, სადაც ჟურნალისტი შალვა რამიშვილის სექსუალურ შევიწროებაში მხილებაზე დეპუტატებს კრიტიკულ კითხვებს უსვამდა.
  • "2023 წლის 31 მარტს თქვენ დაარღვიეთ ზემოაღნიშნული ქვეპუნქტის მოთხოვნა, რაც დასტურდება პირველს გადაცემა შაბათის ფორმულაში გაშვებული სიუჟეტით", — წერია განცხადებაში.
  • მათ აკრედიტაცია 2023 წლის 3 მაისის ჩათვლით აქვთ შეჩერებული.
  • "რა სიმბოლურია, რომ შალვა რამიშვილზე გაკეთებული რეპორტაჟის შემდეგ შემიჩერეს აკრედიტაცია პარლამენტში", — წერს გოზალიშვილი ფეისბუქგვერდზე.

ქარტიის განცხადებით, მედიის აკრედიტაციის ახალი წესი ზღუდავს ინფორმაციის მოპოვებისა და გავრცელების შესაძლებლობას.

  • ორგანიზაცია კიდევ ერთხელ აღნიშნავს, რომ იმ ფონზე, როდესაც მედიისთვის ფაქტობრივად შეუძლებელია საჯარო ინფორმაციის მიღება და მმართველი პარტიის წარმომადგენლები შერჩევითად აძლევენ ინტერვიუს მედიასაშუალებებს, მსგავსი რეგულაციები რიგი მედიასაშუალებებისთვის შეუძლებელს ხდის ინფორმაციის მოპოვებასა და საზოგადოებისთვის მიწოდებას.
  • ქარტია მოუწოდებს საქართველოს პარლამენტის თავმჯდომარეს, არ დაუშვას, რომ საფრთხე შეექმნას დემოკრატიის ისეთ პრინციპებს, როგორიცაა ანგარიშვალდებულება, საჯაროობა, ღიაობა და გააუქმოს მიღებული ბრძანება, რომელიც გამოიწვევს ფორმალურ დაბრკოლებებს და საქმიანობის შეზღუდვას მედიისთვის.