გუშინ აბაშიძე-კარასინის საუბრის ჩანაწერი, Youtube არხ კიბერ კმარაზე გავრცელდა. რუსეთთან ურთიერთობის საკითხებში პრემიერმინისტრის სპეციალურმა წარმომადგენელმა, ზურაბ აბაშიძემ ჩანაწერის ავთენტურობა პირველ არხთან დაადასტურა.

რატომ არის მნიშვნელოვანი: აბაშიძე-კარასინის ფორმატი 2008 წლის შემდეგ პირველია, როდესაც საქართველო-რუსეთის ოფიციალურ პირები ერთმანეთს პირადად ესაუბრებიან — ის 2012 წლიდან დაიწყო.

• გავრცელებულ ჩანაწერში, რომელიც აბაშიძის თქმით 20 ან 21 ივნისს შედგა, მეგობრული მოკითხვის შემდეგ კარასინი ამბობს, რომ რუსეთის ტრანსპორტის სამინისტრო "კმაყოფილია ბოლო კონტაქტებით" და სურს, ისინი რეგულარული გახდეს.
• საუბარია ქვეყნებს შორის გაზრდილი ტვირთბრუნვის ფონზე ახალი კორიდორის მშენებლობაზე, რომელიც რუსეთს და საქართველოს დააკავშირებს.

ვრცლად ჩანაწერზე: აბაშიძე კითხულობს, სად იქნება კორიდორი, რომლის იდეაც რუსებს აქვთ, რაზეც კარასინი ამბობს: "არ ვიცი. რუკა არ გვქონდა ხელში, მაგრამ ეს კრასნოდარის ოლქიდანაა პირდაპირ ტერიტორიაზე... მე როგორც ვხვდები, ეს რაღაც ადგილია, დაახლოებით რომ ვთქვათ, სამხრეთ ოსეთის მარცხნივ".

• პასუხად აბაშიძე კარასინს ყაზბეგი-ლარსის მიმართულებით პარალელური ახალი გზის მშენებლობაზე ესაუბრება და ახსენებს, რომ ამაზე ადრეც უსაუბრიათ.
• კარასინი ამბოს, რომ სურს აბაშიძე ინფორმირებული იყოს და "მთავარია ხელი შეუწყონ იმას, რომ თუ საჭიროება ჩნდება, მხარეებმა ერთმანეთში იკონტაქტონ".
• "ახლა, გულწრფელად რომ ვთქვათ, საუბარი იმაზე, რომ სადღაც რაღაცას ვიწყებთ, ამის დრო არ არის", — ამბობს აბაშიძე და კარასინი უდასტურებს, რომ ახლა "ცოტა არაადეკვატურია".
• დიალოგი ლავროვის დაგეგმილი ვიზიტების, სამუშაო გეგმების და ამინდის განხილვით გრძელდება — აბაშიძე კარასინს უხსნის, რომ არც ცხელა, არც ცივა და კარგი, სასიამოვნო ამინდია.
• "კარგი. ხელს გართმევ. შენები მომიკითხე. ნახვამდის, გეხვევით", — ასე ასრულებს საუბარს კარასინი და პასუხად მადლობებს იღებს.

გამოხმაურებები: დროას ლიდერის, ელენე ხოშტარიას განცხადებით, გავრცელებული ჩანაწერის ტონი და შინაარსი იმის ბრალია, რომ "არაფორმალური ოლიგარქი ჩვენს ზურგს უკან ატარებს რუსულ პოლიტიკას".

• "მთავარი კითხვა არის ის, თუ რას ვშვრებით ჩვენ? ვეგუებით თუ არა აი, ამ პრორუსული, რუსული უმცირესობის მხრიდან ჩვენი სახელმწიფო ინტერესების ღალატს და მიტაცებას და რა თქმა უნდა, ქართულ საზოგადოებაში ეს პასუხი არის — არა და 24 თებერვალი განმსაზღვრელი საერთოდ ევროპის", — აცხადებს ის.

• "სტრატეგია აღმაშენებლის" ლიდერის, გიორგი ვაშაძის შეფასებით, ეს საუბარი არის დანაშაული, რომელსაც ქართველი ხალხი არ შეეგუება, ხოლო იმ სატრანსპორტო ფორმატს, რომელსაც დიპლომატები განიხილავენ, საკანონმდებლო ლეგიტიმაცია არ აქვს.

• "გირჩი-მეტი თავისუფლების" ლიდერის, ზურა ჯაფარიძის თქმით კი, არ ვართ ის ხალხი, ვინც ამ ფონზე "რუსეთს ასეთ ტონალობაში მეგობრულად და ჯიგრულად ველაპარაკებით" — ისიც 24 თებერვალს მოსახლეობას პარლამენტის წინ შეკრებისკენ და ფაქტის დაგმობისკენ მოუწოდებს.

რას ამბობენ ქართულ ოცნებაში: დეპუტატი, მიხეილ სარჯველაძემ კი იმედის ეთერში განაცხადა, რომ აუდიოჩანაწერის შინაარს საფრთხის შემცვლად არ მიიჩნევს.

• "არ მგონია, რომ საფუძვლიანია სკეპტიციზმი, რომელსაც კრიტიკული დამოკიდებულება ავლენს — ჩვენი ოპონენტების მხრიდან აჟიოტაჟი ხელოვნურად არის შექმნილი", — აცხადებს ის.
• მმართველი პარტიის კიდევ ერთი წევრი, ბექა დავითულიანი ფიქრობს, რომ მათ სატელეფონო კონტაქტში "სკანდალური არაფერია".
• "იმაში, რომ კარასინი-აბაშიძის ფორმატში ორი მთავარი მონაწილე, თავად კარასინი და აბაშიძე ერთმანეთს ტელეფონზე ეკონტაქტებიან, მე ამაში სკანდალურს ვერაფერს ვხედავ", — ამბობს ის.

გარდა ამისა, ლელო ზურაბ აბაშიძის პარლამენტში დაბარებას ითხოვს, რათა აბაშიძემ საზოგადოებას სრული ინფორმაცია მიაწოდოს, თუ რა პროექტებზე საუბრობდნენ ის და კარასინი.

• თავად აბაშიძემ ჩანაწერის გამოქვეყნების შემდეგ აღნიშნა, რომ ის ორჯერ მოისმინა, მაგრამ ვერ მიხვდა, "სასკანდალო რა არის".