რუსეთის უსაფრთხოების ფედერალური სამსახური (FSB) ამტკიცებს, რომ ყირიმის ხიდზე მომხდარი "ტერაქტის" ორგანიზატორები დაადგინა.

რატომ არის მნიშვნელოვანი: აფეთქება, რომელმაც ქერჩის ხიდის დაზიანება გამოიწვია 8 ოქტომბერს გამთენიისას მოხდა.

• რუსეთიდან ყირიმამდე თითქმის 19 კილომეტრიანი ხიდი კრემლის ოკუპაციის ერთგვარი სიმბოლოა. ის 2018 წელს ნახევარკუნძულის ანექსიის გამოცხადებიდან 4 წელში გახსნეს.
• ქერჩის ხიდი ერთ-ერთი საკვანძო გზაა, რითაც ოკუპანტებს სამხედრო ტექნიკა და ტვირთი გადააქვთ.
• ხიდის დაზიანების გამო, რუსეთს უკრაინის სამხრეთში მხოლოდ ერთი სარკინიგზო მომარაგების ხაზი რჩება — მელიტოპოლიდან.

დეტალები: FSB აცხადებს, რომ ტერაქტს უკრაინის თავდაცვის სამინისტროს მთავარი სადაზვერვო სამმართველოს ხელმძღვანელი, კირილ ბუდანოვი, ასევე, "თანამშრომლები და აგენტურა" მეთაურობდნენ.

• რუსეთის უშიშროების ვერსიით, ასაფეთქებელი მოწყობილობა სამშენებლო მასალებში იყო შენიღბული. მათი მტკიცებით, აგვისტოს დასაწყისში ტვირთი თავდაპირველად ოდესის პორტიდან ბულგარეთში, შემდეგ საქართველოში, ფოთის პორტში და ბოლოს სომხეთში გაგზავნეს.
• შემდეგ სომხეთიდან ტვირთი ისევ საქართველოში, ბოლოს კი რუსეთში გაიგზავნა.
• მათი თქმით, გადაცემაში უკრაინისა და სომხეთის მოქალაქეებთან ერთად, საქართველოს ორი მოქალაქეც — სანდრო ინოსარიძე და ბროკერი სახელად, ლევანი მონაწილეობდა.

FSB-ის მტკიცებით, 29 სექტემბრიდან 3 ოქტომბრის ჩათვლით ტვირთი ერევნის ტერმინალში განაბაჟეს და საბუთები შეცვალეს, რის შემდეგაც ტვირთის გამგზავნად სომხეთში რეგისტრირებული კომპანია GU AR GROUP, ხოლო მიმღებად მოსკოვში რეგისტრირებული კომპანია ლიდერი მიუთითეს.

• უშიშროება ამბობს, რომ ამ ტვირთმა საქართველოში რეგისტრირებული სატვირთო მანქანით რუსეთ-საქართველოს საზღვარი 4 ოქტომბერს გადაკვეთა, ორი დღის შემდეგ კი არმავირის საბითუმო ბაზაზე გადმოტვირთეს.
• მათივე ვერსიით, 7 ოქტომბერს უკრაინის 2-მა მოქალაქემ რუსეთის 5 მოქალაქის დახმარებით, ტვირთის საბუთები ისევ შეცვალეს და გამგზავნად ქალაქ ულიონოვსკში მდებარე კომპანია TEK-34 მიუთითეს, ხოლო მიმღებად ყირიმში არარსებული კომპანია იყო მითითებული.
• უწყება აცხადებს, რომ იმავე დღეს ტვირთი რუსეთის მოქალაქის, მახირ იუსუბოვის სატვირთო მანქანაში გადაიტანეს, რომელიც სიმფეროპოლისკენ წავიდა, ყირიმის ხიდზე გადასვლისას კი მანქანა აფეთქდა.

გარდა ამისა, უშიშროება ირწმუნება, რომ ტვირთის მოძრაობას მთელ მარშრუტზე უკრაინის თავდაცვის სამინისტროს მთავარი სადაზვერვო სამმართველოს თანამშრომელი აკონტროლებდა, რომელიც სქემის მონაწილეებს ივან ივანოვიჩის სახელით გაეცნო.

• "ქმედებების კოორდინაციისთვის მან გამოიყენა ანონიმური ნომერი, ასევე, ტელეფონი, რომელიც ქალაქ კრემენჩუგის მცხოვრების, სერგეი ანდრეიჩენკოზე იყო რეგისტრირებული".
• FSB ამბობს, რომ ამ ეტაპზე საქმეზე 8 ადამიანია დაკავებული. მათ შორის, 5 რუსეთის, ხოლო 3 უკრაინისა და სომხეთის მოქალაქეები არიან.

ბრალდებების საპასუხოდ, უკრაინა აცხადებს, რომ ყალბი სტრუქტურების განცხადებაზე, კომენტარს არ გააკეთებენ.

• "FSB-ის მთელი საქმიანობა სისულელეა. ესენი ყალბი სტრუქტურები არიან, რომელიც პუტინის რეჟიმს ემსახურებიან".

Unian წერს, რომ FSB-მ თავისი "გამოძიების" ფარგლებში გაავრცელა სატვირთო მანქანის რენტგენი, რომელშიც, მათი მტკიცებით, ასაფეთქებელი ნივთიერება იყო.

• თუმცა InformNapal-ის ანალიტიკოსები თვლიან, რომ ასაფეთქებელი ნივთიერება მანქანაში საერთოდ არ ყოფილა, წინააღმდეგ შემთხვევაში რენტგენი მის კვალს აჩვენებდა.
• მეტიც, ექსპერტები აღნიშნავენ, რომ ინციდენტის შემდეგ გამოქვეყნებული ვიდეობის მიხედვით, ყირიმის ხიდზე აფეთქების მიზეზი სატვირთო საერთოდ არ ყოფილა.
• ანალიტიკოსების აზრით, ეს ვერსია FSB-მ მიზანმიმართულად გაავრცელა იმ ეჭვების გასაქარწყლებლად, რომ ამაში ბრალი რუსეთის სპეცსამსახურებს მიუძღვით.

არქივიდან: ის, რომ ყირიმის ხიდის აფეთქებამდე სატვირთო საქართველოშიც იმყოფებოდა, რუსულმა მხარემ 9 ოქტომბერს თქვა.

• ასევე, ამბობდნენ, რომ კრემლს ყირიმის ხიდზე მომხდარი აფეთქების გამოძიება სურდა.
• მომხდარიდან მეორე დღესვე პუტინმა აფეთქებას ტერორისტული აქტი უწოდა.